Azərbaycan, Bakı, 8 oktyabr /Trend, müxbir Rufiz Hafizoğlu
Türkiyənin Diyarbəkir, Hakkari, Van və Batman vilayətlərində keçirilən etiraz aksiyaları ilə əlaqədar məktəblərdə tətil elan edilib. Trend-in məlumatına görə, bu barədə Türkiyənin "Kanal7" telekanalı xəbər verib.
Məlumata əsasən, adıçəkilən vilayətlərdə ilkin olaraq bir gün müddətinə dərslər dayandırılıb.
Dünən ölkənin 6 əyalətində oktyabrın 8-dən komendant saatı elan edilib. Komendant saatı Diyarbəkir, Mardin, Siirt, Muş, Van və Batman əyalətində tətbiq edilib.
Məhz bu bölgələrdə etirazlar və iğtişaşlar daha geniş vüsət alıb. Etirazçılar mağazalara və bələdiyyə əmlakına ciddi zərər vurur, polis əməkdaşlarını daş-qalaq edirlər. Onlar, həmçinin yandırıcı maye ilə doldurulmuş şüşə qablarından istifadə edərək bina və obyektlərə, avtomobillərə od vururlar.
Etiraz aksiyalarında əsasən yerli kürdlər, kürdyönümlü partiyaların və PKK-nın tərəfdarları iştirak edirlər.
Suriyanın Kobani şəhəri ətrafında yaranmış vəziyyətin iğtişaşlara əsas səbəb olduğu bildirilir.
Qeyd edək ki, bu şəhərdə "İslam Dövləti" qüvvələri və kürd özünümüdafiə dəstələri arasında hazırda şiddətli döyüşlər davam edir və etirazçılar rəsmi Ankaranın münaqişəyə müdaxilə etməmək və gözləmə siyasətinə üstünlük verməsinə qarşı çıxırlar.