Azərbaycan, Bakı / Trend , müxbir İ.Əlizadə/ Mayın 24-də Moskvada Azərbaycan Milli Məclisinin və Rusiya Federasiyası Federal Məclisinin ikitərəfli parlamentlərarası komissiyasının iclası keçiriləcək. Bu barədə Milli Məclisin mətbuat xidmətindən məlumat verilib.
Milli Məclisin deputatları - Regional məsələlər daimi komissiyasının sədri, Azərbaycan-Rusiya parlamentlərarası əlaqələr üzrə işçi qrupunun rəhbəri Arif Rəhimzadə, Elton Məmmədov, Rövşən Rzayev və Mixail Zabelin iclasda iştirak etmək üçün mayın 23-də Moskvaya yola düşəcəklər.
İclasda Azərbaycan Respublikasının Rusiya Federasiyası ilə ticarət-iqtisadi əməkdaşlığının vəziyyəti, perspektivləri və qanunvericilik təminatı, iki ölkə arasında elmi-texniki, mədəni və humanitar sahələrdə fəaliyyətin hüquqi əsasları, qurumun qarşısında duran vəzifələr və digər mövzularda fikir mübadiləsi aparılacaq.
Parlament nümayəndə heyətinin üzvləri müzakirə olunacaq məsələlərlə bağlı çıxış edəcək, münasibətlərini bildirəcəklər.