Azərbaycan, Bakı, 17 noyabr / Trend , müxbir C.Babayeva/ Azərbaycanın Qarabağ Azadlıq Təşkilatı (QAT) və "Azad müəllimlər" birliyi orta və ali məktəblərdə təhsil alanlar arasında vətənpərvərlik hissinin gücləndirilməsi ilə bağlı təhsil naziri Misir Mərdanova müraciət ünvanlayıb.
"Müraciətdə orta və ali məktəblərdə Qarabağ Azadlıq Təşkilatının üzvləri - ziyalılar, Qarabağ veteranları ilə görüşlərin təşkil olunması, vətənpərvərlik mövzusunda inşa müsabiqələrinin keçirilməsi kimi konkret təkliflər irəli sürülüb", - deyə bazar ertəsi Trend -a QAT sədri Akif Nağı məlumat verib.
Nağının sözlərinə görə, şagird və tələbələr arasında vətənpərvərlik hissinin gücləndərilməsi məsələsinə digər qeyri-hökumət təşkilatlarının da dəstək verəcəyi gözlənilir. "Bu məqsədlə bu həftə ərzində Azərbaycanın Milli Qəhrəmanları Tanıtım İctimai Birliyinin nümayəndələri və Şuşa teatrının kollektivi ilə görüşlər keçiriləcək", - deyə QAT sədri bildirib.
Trend -un arayışı: QAT Qarabağın erməni işğalçılarından azad olunması üçün ictimai mübarizəni təşkil etmək məqsədilə 2000-ci ildə Bakıda yaradılıb. Qurumun rəhbəri tarix elmləri namizədi, dosent Akif Nağıdır. Təşkilat öz sıralarında Azərbaycanın tanınmış ziyalıları, qaçqın və məcburi köçkünləri, gənclər, keçmiş döyüşçülər, ehtiyatda olan yüksək rütbəli zabitlər olmaqla 10 min nəfəri birləşdirir. QAT-ın Azərbaycan üzrə 74 yerli şöbəsi və müxtəlif xarici ölkələrdə təmsilçiləri fəaliyyət göstərir.
QAT 4-5 il bundan əvvəl vətənpərvərlik mövzusunda hazırladığı plakatların orta və ali məktəblərdə yayılması üçün Təhsil Nazirliyinə müraciət etsə də, nazirlik bü təklifdən imtina etmişdi.
Məqalə müəllifi ilə əlaqə saxlamaq üçün ünvan: [email protected]
