Azərbaycan, Bakı, 20 oktyabr / Trend , muxbir H.Bağırov/
"Ümumdünya Texnologiya Universiteti"nin Bakıdakı struktur bölməsi rəhbərinin məhkəməsi başlayıb.
Bu gün Ağır Cinayətlərə Dair İşlər üzrə Məhkəmədə Zülfi Babayev ifadə verib. O, elan olunmuş ittiham üzrə özünü təqsirli bilməyib.
O bildirib ki, Rusiyada fəaliyyət göstərən Ümumdünya Texnologiya Universitetinin Bakıdakı "Nab" mərkəzini həmin universitet rəhbərliyinin rəsmi razılığı əsasında açıb və Tədris Mərkəzi həmin universitetin sahibi tərəfindən ona verilmiş etibarnamə əsasında fəaliyyət göstərib. Onun sözlərinə görə, təhsil haqları rəsmiləşdirilib və aybaay pul ödəyən tələbələrə qəbzlər verilib.
İttihama görə, "Nab" Məhdud Məsuliyyətli Cəmiyyətin təsisçisi və direktoru olan Zülfi Babayev özü və üçüncü şəxslər üçün qanunsuz üstünlük əldə etmək üçün vəzifə səlahiyyətlərindən qulluq mənafeyinə qəsdən zidd olaraq istifadə edib. O, dövlət qeydiyyatı və lisenziyası olmadan Rusiya Federasiyasının Moskva şəhərində yerləşən YUNESKO Ümumdünya Texnologiya Universitetinin rəhbərliyi ilə aralarında bağlanmış 01 fevral 2008-ci il tarixli, həmçinin həmin universitet tərəfindən ona təqdim edilmiş etibarnaməyə əsaslanaraq tədris kursları təşkil etmək adı altında Bakıda bu universitetin nümayəndəliyini yaradıb.
Babayev Azərbaycan ərazisində qanunla nəzərdə tutulmadığı halda, bir sıra vətəndaşlara distant yolla təhsil almaq hüququnu izah edərək, nümayəndəliyə müəllim kimi işə qəbul etdiyi şəxslər vasitəsilə tələbələr cəlb edərək, bu şəxslərə tələbə biletləri, imtahan kitabçaları verməklə müvafiq tədris işlərini həyata keçirib. O, qanunsuz fəaliyyət göstərən tədris müəssisəsindəki müxtəlif fakültələrə qəbul etdiyi tələbələrin hər biri üçün özlərindən və ya valideynlərindən 700 manat pul alıb.
Təqsirləndirilən şəxs Cinayət Məcəlləsinin külli miqdarda ziyan vurmaqla dələduzluq (178.3.2), qanunsuz sahibkarlıq (192.1) və vəzifə səlahiyyətlərindən sui-istifadə (308.1), vəzifə saxtakarlığı (313) maddələri ilə ittiham olunur.
Babayev bu ilin martın 12-də Milli Təhlükəsizlik Nazirliyi əməkdaşlarının keçirdiyi əməliyyat axtarış tədbirləri nəticəsində tutulub. Cinayət işinin ibtidai istintaqı Baş Prokurorluq yanında Korrupsiyaya Qarşı Mübarizə İdarəsi tərəfindən aparılıb.
Məqalə müəllifi ilə əlaqə ünvanı: [email protected]
