Azərbaycan, Bakı, 11 iyun /Trend, müxbir İ.İsabalayeva/
ABŞ-Azərbaycan təhsil mərkəzinin şənbə günü açılışı keçirilib. Trend-in məlumatına görə, açılışda iştirak edən ABŞ-ın Azərbaycandakı səfiri Metyu Brayza bildirib ki, təhsil mərkəzi Amerika şurası (IREX), Bakı Təhsil Məlumat Mərkəzi və ABŞ-da təhsil almış Azərbaycanlı Məzunlar Assosiasiyası kimi təşkilatları özündə birləşdirən yeni mərkəzdir.
"ABŞ universitetlərində təhsil almaq insanın həyatında böyük təcrübə ola bilər. ABŞ universitetlərində təhsil almaq əlaqələri, dünyagörüşünü genişləndirə bilər", - səfir bildirib.
ABŞ təhsil sisteminin Azərbaycanın təhsil sistemindən fərqləndiyini qeyd edən Brayza bildirib ki, ABŞ universitetlərinə qəbul üçün ərizə formaları daha fərqli və çətin ola bilər.
"ABŞ-da universitetlərə gəlməmişdən əvvəl tələbələrin ali təhsil müəssisəsi, onların əldə edə biləcəkləri imkanlar barədə məlumatları olmalıdır. Onlar həm də əvvəlcədən təhsillərinin necə maliyyələşəcəyini bilməlidirlər. ABŞ-Azərbaycan təhsil mərkəzi tələbələrə bu imkanları tanıdır", - səfir Brayza bildirib.