...

Azərbaycan gənclərinin Litvada təhsil alması üçün müsabiqə elan edilib

Cəmiyyət Materials 5 İyul 2011 15:49 (UTC +04:00)
Heydər Əliyev Fondu və Litvanın Azərbaycandakı səfirliyi arasında bağlanmış müqaviləyə əsasən, 2011/2012-ci tədris ilində Litvanın təhsil müəssisələrində Azərbaycan gənclərinin dövlət hesabına təhsil alması üçün müsabiqə elan edilib.
Azərbaycan gənclərinin Litvada təhsil alması üçün müsabiqə elan edilib

Trend-i buradan izləyin

Azərbaycan, Bakı, 5 iyul /Trend, müxbir İ.İsabalayeva/

Heydər Əliyev Fondu və Litvanın Azərbaycandakı səfirliyi arasında bağlanmış müqaviləyə əsasən, 2011/2012-ci tədris ilində Litvanın təhsil müəssisələrində Azərbaycan gənclərinin dövlət hesabına təhsil alması üçün müsabiqə elan edilib.

Tələbə Qəbulu üzrə Dövlət Komissiyasının mətbuat xidmətindən Trend-ə verilən məlumata görə, bakalavr təhsili üzrə müsabiqədə cari tədris ilində Azərbaycanın ali təhsil müəssisələrinə müvafiq ixtisas qrupu üzrə qəbul imtahanında iştirak etmiş və həmin ixtisas qrupu üzrə müəyyən edilmiş müsabiqə şərtlərini ödəmiş abituriyentlər iştirak edə bilərlər. I, II və III ixtisas qrupuna aid olan ixtisasların müsabiqəsində iştirak etmək üçün abituriyentlərin ingilis dili fənnindən nisbi balı 70-dən az olmamalıdır. IV ixtisas qrupuna aid olan ixtisasların müsabiqəsində iştirak etmək üçün abituriyentlərin ingilis dili fənni üzrə attestat qiyməti 5 olmalıdır.

Magistratura səviyyəsi üzrə müsabiqədə iştirak etmək hüququna cari tədris ili üçün Azərbaycan Respublikası ali təhsil müəssisələrinin magistraturasına qəbul imtahanlarında müsabiqə şərtlərini ödəmiş, bununla yanaşı, imtahanın birinci mərhələsində ingilis dili üzrə testdən topladığı bal 20-dən az olmayan bakalavrlar malikdirlər.

Müsabiqədə iştirak etmək istəyənlər iyulun 8-dən avqustun 2-dək TQDK-da yaradılmış Sənəd Qəbulu Komissiyasında qeydiyyatdan keçməlidirlər. Müsabiqədə iştirak üçün namizədliyi qeydə alınmış şəxslərlə avqustun 3-də TQDK-da müsahibə keçiriləcək. Müsahibə zamanı onların ingilis dili üzrə bilikləri yoxlanacaq. Bu mərhələni müvəffəqiyyətlə keçənlər isə təyin olunacaq vaxtda Litvanın Azərbaycandakı səfirliyində ingilis dili üzrə əlavə test imtahanı verəcəklər.

Müsabiqədə müvəffəqiyyət qazananların Litvada təhsil alması dövlət hesabına maliyyələşdirilir.

Xəbər lenti

Xəbər lenti