Naxçıvanda yeni fənlərin tətbiqi ilə bağlı təlim kursları başlayıb

Azərbaycan, Naxçıvan/ Trend , müxbir E.Məmmədov/ Naxçıvan Muxtar Respublikasının (MR) orta məktəblərində ibtidai siniflər üçün yeni fənlərin tətbiqi ilə bağlı təlim kursları işinə başlayıb.

Azərbaycan hökuməti və Dünya Bankının Beynəlxalq İnkişaf Assossiasiyası arasında bağlanmış müqaviləyə əsasən, həyata keçirilən layihə müəllimlərin praktik hazırlığı və peşəkarlıq səviyyəsinin artırılması məqsədi daşıyır.

Azərbaycanın təhsil naziri Misir Mərdanovun müvafiq əmrinə əsasən, təlim kursları Naxçıvan Müəllimlər İnstitutunun bazasında həyata keçirilir. Kursları aparmaq üçün Bakıda fəaliyyət göstərən Kurrikulum Mərkəzinin altı əməkdaşı Naxçıvana ezam olunub.

Naxçıvana ezam olunan Təhsil Problemləri İnstitutunun direktor müavini, Kurrikulum Mərkəzinin direktoru Ənvər Abbasovun bildirdiyinə görə, kurslara Muxtar Respublikanın şəhər və rayonlarından seçilmiş 36 təhsil şöbəsinin əməkdaşları və ibtidai sinif müəllimləri cəlb olunub.

Yeni fənn kurrikulumlarının (İnkişaf konsepsiyası) 2008-2009-cu dərs ilindən tətbiq ediləcəyi planlaşdırılır.

Naxçıvan MR-in ərazisi 5,5 min kvadrat kilometrdir. Ölkə ərazisinin 6,4%-ni təşkil edir. 7 inzibati rayona (Babək, Şərur, Ordubad, Sədərək, Şahbuz, Culfa və Kəngərli ) bölünüb. Əhalisi 380,2 min nəfər, paytaxtı Naxçıvan şəhəridir.

Məqalə müəllifi ilə əlaqə ünvanı news@trend.az
Bizi Twitter-dən izləyin @trend_az

Trend-in ən mühüm və maraqlı xəbərlərini "Telegram"da izləyin