...

Gənc tamaşaçı: Dünya Kubokunun yarışlarına baxmaq çox maraqlıdır

İdman Materials 16 Fevral 2019 23:40 (UTC +04:00)
Azərbaycan gimnastlarına yarışlarda həmişə birinci yer qazanmağı arzu edirəm
Gənc tamaşaçı: Dünya Kubokunun yarışlarına baxmaq çox maraqlıdır

Bakı. Cani Babayeva - Trend:

Azərbaycan gimnastlarına yarışlarda həmişə birinci yer qazanmağı arzu edirəm. Bunu Trend-ə Bakıda keçirilən batut gimnastikası və tamblinq üzrə Dünya Kubokunun gənc tamaşaçısı Duyğu Əlizadə deyib.

Batut gimnastikası ilə məşğul olan D.Əlizadə bildirib: "Bu gün mən Milli Gimnastika Arenasına batut gimnastikası və tamblinq üzrə Dünya Kubokunda iştirak edən azərbaycanlı gimnastları dəstəkləməyə gəlmişəm. Yarışlara baxmaq maraqlıdır, gimnastlar yaxşı nəticə göstərəndə çox sevinirlər. Bütün tamaşaçılar yarışlara baxmaqdan böyük həzz alır".

Qeyd edək ki, Bakıda batut gimnastikası və tamblinq üzrə ilin ilk Dünya Kuboku keçirilir. Turnirdə 30 ölkədən 160-dan çox gimnast iştirak edir.

Tokio Olimpiya Oyunlarına təsnifat xarakteri daşıyan və batutçular üçün ilin ən vacib startlarından biri olan bu Dünya Kubokunda Vladislav Qonçarov, Rozanna Maklennan, Ceyson Börnett, Dun Dun, Qao Ley, Dmitri Uşakov və Peyc Brioni kimi Olimpiya ulduzları mübarizə aparır.

Azərbaycanı isə batut yarışlarında qadınlar arasında sinxron proqramda son Avropa çempionatının gümüş medalçısı Veronika Zemlyanaya, kişilər arasında sinxron və fərdi proqramlarda Ruslan Ağamirov, İlya Qrişunin, Oleq Piunov və tamblinq cığırında Avropa çempionumuz (2018-ci il) Mixail Malkin təmsil edirlər.

İki gün davam edəcək yarışların ilk günü təsnifat mərhələləri keçirilir, ikinci gün isə final mərhələləri baş tutacaq.

Turnirdə ən yüksək icra xalını toplamış gimnastlara ənənəvi “AGF Trophy” Kuboku da təqdim olunacaq.

2019 və 2020-ci illərdə Tokio Olimpiya Oyunlarına batut gimnastikası üzrə təsnifat xarakterli 6 Dünya Kuboku keçiriləcək. Paytaxtımız gələn il bu kuboklardan daha birinə də ev sahibliyi edəcək.

Xatırladaq ki, ötən il Bakıda 26 ölkənin iştirakı ilə gimnastikanın bu növü üzrə Avropa çempionatı, daha öncəki illərdə isə Dünya kubokları (2016-cı il 17 ölkə, 2017-ci il 15 ölkə) keçirilib.

Xəbər lenti

Xəbər lenti