Azərbaycan, Bakı, 10 sentyabr/ Trend , müxbir İ.Xəlilova/ "Azərbaycan Dövlət Neft Şirkəti (ARDNŞ) 2009-cu ildə bondların ilk buraxılışını həyata keçirməyə hazırdır", - ARDNŞ-in iqtisadi məsələlər üzrə vitse-prezidenti Süleyman Qasımov bildirib. Onun sözlərinə görə, debüt buraxılışın $500 mln. səviyyəsində olacağı gözlənilir ki, bu da beynəlxalq reytinq agentliklərinin rəyinə görə, daha münasib səviyyədir.
"Bu həcm xarici bazarlarda ARDNŞ-in imicini artırmağa imkan yaratdığı üçün, bizi də qane edir", - Qasımov bildirib.
Dövlət Neft Şirkətinin qiymətli kağızları beş ilə hesablanıb. Bondların yerləşdirilməsi üzrə ARDNŞ-in məsləhətçisi - Amerikanın Citibank-ı onları ABŞ-da yerləşdirməyi təklif edir, belə ki, Amerika bazarında onlara maraq daha çoxdur. Bununla yanaşı, Qasımovun qeyd etdiyinə görə, müxtəlif ölkələrin beş-altı birjası artıq bondların yerləşdirilməsinə maraq göstərib.
Gələn il avrobondların buraxılmasına dair planlar bunadək ən azı iki il əvvəl beynəlxalq auditinin aparılmasının zəruri olması ilə bağlıdır. Vitse-prezidentin sözlərinə görə, Dövlət Neft Şirkəti 2007-ci ildə fəaliyyətinin yekunları üzrə artıq bir beynəlxalq audit keçirib, ikinci isə 2008-ci ilin yekunları üzrə planlaşdırılıb. Bundan əlavə, Amerikanın Miller & Land şirkəti ARDNŞ-in yataqlarındakı karbohidrogen ehtiyatlarının qiymətləndirilməsini aparıb. Şirkətin hesabatı artıq ARDNŞ rəhbərliyi tərəfindən təsdiqlənib.
Azərbaycan və onun təsərrüfat subyektləri hələ ki xarici bazarlarda avrobondların yerləşdirilməsi üzrə planlar həyata keçirməyiblər. Maliyyə Nazirliyi $500 mln. məbləğdə avrobondun yerləşdirilməsi tarixini hələ müəyyən etməyib. Bundan əlavə, Azərbaycanın bir sıra bankları da bu prosesə fəal qoşulub. Azərbaycan Beynəlxalq Bankı $200 mln., Unibank - $150 mln., Bank Standard - $150 - 200 mln. həcm barədə bəyanat verib.
Müəlliflə əlaqə saxlamaq üçün elektron ünvan [email protected]
