Azərbaycan, Bakı, 8 oktyabr / Trend müxbir İ.Əlizadə/ Azərbaycan hökumətinin Ümumdünya Ticarət Təşkilatının (ÜTT) işçi qrupu ilə növbəti (dördüncü) görüşü 2008-ci ildə baş tuta bilər. Bunu danışıqlar qrupunun rəhbəri, xarici işlər nazirinin müavini Mahmud Məmmədquliyev bildirib.
їƏgər Azərbaycan oktyabrın sonunadək ÜTT katibliyinə təkliflərini verə bilərsə, növbəti danışıqlar cari ilin sonunda keçiriləcəkї, - deyən Məmmədquliyev əks təqdirdə danışıqların 2009-cu ilə qalacağını qeyd edib. Belə ki, danışıqlar ÜTT-yə üzv dövlətlərin cavabından iki-üç ay sonra mümkündür.
Hazırda Azərbaycan ABŞ, Avropa İttifaqı, Cənubi Koreya, Yaponiya, Şri-Lanka, Ekvador, Çinin əyaləti olan Tayvan, Hindistan, Braziliya və Norveç ilə danışıqlar mərhələsindədi. Türkiyə, Oman Sultanlığı, Birləşmiş Ərəb Əmirlikləri ilə ikitərəfli danışıqlar başa çatıb və protokollar imzalanıb. Azərbaycan Moldova ilə protokolun imzalanması mərhələsindədi, Qırğızıstan və Gürcüstan ilə müvafiq prosedur hökumətlərarası komissiyanın növbəti iclasında baş tuta bilər.
Nazir müavini hesab edir ki, ÜTT-də üzvlük məsələsində rəsmi Bakı müddətə deyil keyfiyyətə üstünlük verir.
Azərbaycanın ÜTT-yə əlverişli şərtlərlə daxil olmaq istədiyini qeyd edən Məmmədquliyev deyib ki, їƏgər biz kənd təsərrüfatı və sənayemizin inkişafını istəyiriksə, elə şərtləri qəbul etməliyik ki, müvafiq sahələrin tərəqqisinə mane olmasın. Məhz buna görə bu danışıqlar çox mürəkkəbdirї.
Məmmədquliyevin sövlərinə görə, ÜTT üzv dövlətlər Azərbaycanda bəzi sahələrdə vergilərin və tariflərin endirilməsini, ticarət rejiminin və bazar xidmətlərinin liberallaşdırılmasını tələb edirlər. Ümumilikdə isə Azərbaycanda bank (Birbaşa filialların açılması yolu ilə) və sığorta bazarlarına (100 faizli xarici kapitalla yerli strukturların yaradılması yolu ilə) daxil olma tələbləri qalmaqdadır.
1997-ci ildən Azərbaycan Ümumdünya Ticarət Təşkilatında müşahidəçi kimi təmsil olunur.
Müəlliflə əlaqə saxlamaq üçün elektron ünvan: [email protected]
