Azərbaycan, Bakı, 12 dekabr / Trend , müxbir İ.Xəlilova/ "2008-ci ilin yekunları üzrə Azərbaycanda inflyasiya templərinin 16-17 faiz səviyyəsində olacağı gözlənilir", - ölkənin iqtisadi inkişaf naziri Şahin Mustafayev cümə günü bildirib. Bu günlərdə Azərbaycan Milli Bankı da analoji proqnozlar açıqlayıb.
Nazirin rəyinə görə, ölkədə istehlak qiymətlərinin azalması birbaşa olaraq dünya prosesləri və idxal mallarının ucuzlaşması ilə bağlıdır.
"Lakin inflyasiyanın artım templərinin azalması Azərbaycanda işgüzar fəallığa təsir göstərməyəcək", - Mustafayev vurğulayıb.
Azərbaycan hökumətinin makroiqtisadi proqnozlarına görə, 2009-cu ildə inflyasiyanın artım templərinin orta hesabla 12-14 faiz olacağı gözlənilir.
"İstehlak qiymətlərinə ciddi xarici təsir olmazsa, büdcə xərclərinin artım templərinin azalması, maliyyə bazarının tənzimlənməsi, anti-inflyasiya tədbirlərinin gücləndirilməsi, həmçinin istehlak qiymətlərinin yeni artımının qarşısının alınması ilə əlaqədar bu proqnozlara nail olmaq mümkündür", - iqtisadi inkişaf naziri parlamentdə 2009-cu il dövlət büdcəsinin müzakirəsində bildirib.
Onun sözlərinə görə, 2010-2012-ci illərdə inflyasiyanın artım templəri birrəqəmli səviyyəyədək çatdırılacaq.
Cari ilin 10 ayı ərzində istehlak qiymətləri indeksi illik hesablamada 21,6 faiz təşkil edib.
Hökumətin ilin sonunadək inflyasiyanın azalmasına dair gözləmələri dünyada neft və ərzağın qiymətinin də düşməsindən başqa, onunla bağlıdır ki, inflyasiyaya səbəb olan daxili amillərin sabitləşməsi müşahidə olunur, xüsusilə də pul kütləsinin artım templəri azalıb. 10 ay ərzində pul kütləsi 2007-ci ilin analoji dövründəki 65 faizə qarşı 24 faiz artıb.
Cari ildə Milli Bank anti-inflyasiya tədbirləri görüb. Bu tədbirlərin arasında uçot dərəcəsinin 15 faizdən 8 faizədək azaldılması da var. Məzənnə siyasətinin nizamlanması və ticarət tərəfdaşlarının məzənnələrinin inflyasiyaya təsirinin azaldılması üçün bivalyutalı rejim tətbiq edilib.
Müəlliflə əlaqə saxlamaq üçün elektron ünvan: [email protected]
