Azərbaycan, Bakı, 14 aprel / Trend , müxbir N.İsmayılova, E.İsmayılov /
2010-cu ildə Azərbaycan Nəqliyyat Nazirliyi Ələt qəsəbəsində Bakı beynəlxalq dəniz limanının tikintisinə başlamağı planlaşdırır. Bu barədə çərşənbə axşamı nazirliyin Nəqliyyat siyasəti və iqtisadiyyat şöbəsinin rəhbəri Sədrəddin Məmmədov bildirib.
Hazırda yeni limanın layihələndirilməsi üzrə keçirilən tenderin qalibi olan Hollandiyanın "Royal Haskoning" şirkəti müqavilənin icrasına başlayıb.
"Bu layihə üzərində fəal iş gedir. Düşünürəm ki, layihələndirmə işləri vaxtında başa çatacaq və artıq gələn ildən tikinti işləri başlanacaq", - deyə Məmmədov bildirib.
Onun sözlərinə görə, layihə düzəltmə şirkətinin layihə üzrə ilkin sənədləşdirməni başa çatdırmasından sonra layihə sahəsinin geoloji kəşfiyyatı üzrə işlərə başlanacaq.
Azərbaycanın nəqliyyat nazirinin müavini Musa Pənahov əvvəllər bildirib ki, yarım il ərzində yeni limanın quru və su hissələrinin tikintisi üzrə tenderlər elan olunacaq.
Bu liman multimodal olacaq, çünki gələcəkdə bu ərazidə azad ticarət zonasının yaradılması da planlaşdırılır.
Ələt qəsəbəsində yeni beynəlxalq dəniz limanının tikintisi üç mərhələdə həyata keçiriləcək və 2015-ci ilədək başa çatdırılacaq. 2008-2010-cu illəri əhatə etməli olan layihənin birinci mərhələsi iki bərənin, konteyner, "ro-ro" tipli gəmilər və adi quru yük (universal) gəmilərinin qəbulu üçün üç yük körpüsünün tikintisini nəzərdə tutur. Layihənin ikinci mərhələsi 2011-2013-cü illəri əhatə edir və daha üç yük körpüsünün tikintisini nəzərdə tutur. Layihənin üçüncü mərhələsi (2014-2015-ci illər) əlavə olaraq daha iki yük körpüsünün tikintisini nəzərdə tutur. Limanın tikinti layihəsi 400 mln. dollar həcmində qiymətləndirilir.
Mühəndis tikinti-layihələndirmə şirkəti olan "Royal Haskoning" 1881-ci ildə Hollandiyada yaradılıb.
Məqalə müəllifi ilə əlaqə ünvanı - [email protected]
