Azərbaycan, Bakı, 5 avqust /Trend, müxbirlər T.Cəfərov, N.İsmayılova/
İran hökuməti Astarada sərhəd-buraxılış məntəqəsinin iqtisadi inkişafı layihəsinin gündəliyə çıxarılması barədə qərar qəbul edib. Bu barədə İranın nəqliyyat və yükdaşımalar üzrə Təşkilatının proqramlaşdırılma üzrə rəhbərinin müavini Kamran Rəhimov İranın "FARS" agentliyinə Astarada sərhəd-buraxılış məntəqəsinə baxış zamanı müsahibəsində bildirib.
"Hazırda İranda 24 sərhəd-buraxılış məntəqəsi fəaliyyət göstərir, Astara məntəqəsi isə sərnişin və yüklərin daxil olması və çıxması baxımından ən fəalıdır. Astaradakı sərhəd-buraxılış məntəqəsi Şimal-Cənub nəqliyyat dəhlizinin yolunda yerləşir və onun iqtisadi və strateji mövqeyini nəzərə alaraq, ölkə üçün çox mühüm rol oynayır", - Rəhimov qeyd edib.
Onun sözlərinə görə, iqtisadi inkişafı təmin etmək üçün bu gömrük məntəqəsi vasitəsilə beynəlxalq yüklərin keçməsi prosedurunu sadələşdirmək və idarəetmə prosedurunu azaltmaq lazımdır. Astara gömrük məntəqəsinin inkişafı layihəsi çərçivəsində beynəlxalq dəmiryol xəttinin inkişafı, ticari və iqtisadi limanın istismara verilməsi, eləcə də buraxılış məntəqəsinin inkişafı nəzərdə tutulur.
Rəhimov əlavə edib ki, sərhəd-buraxılış məntəqələrinin vəziyyətinin yaxşılaşdırılması üçün 70 milyon dollar ayrılıb və cari ildə də oxşar məbləğin ayrılacağı nəzərdə tutulub. Onun fikrincə, gömrük məntəqəsinin vəziyyətinin yaxşılaşdırılması üçün tranzit yükdaşımaların daxili daşımalardan ayrılması daha məqsəduyğun olardı.
"Tranzit yük maşınları, yüklər üçün ayrıca ərazilərin ayrılması və xüsusi güzəştlərin verilməsi nəzərdə tutulub", - o qeyd edib.
O əlavə edib ki, Astara gömrük məntəqəsi sutkada 4 min nəfəri və hər beş dəqiqədə bir yük maşınını buraxır.
"Cari ilin üç ayı ərzində bu gömrük məntəqəsi ölkədə fəallığına görə üçüncü sərhəd məntəqəsi olub", - Rəhimov vurğulayıb.
