Azərbaycan, Bakı, 10 avqust /Trend, müxbir N.İsmayılova/
Azərbaycan İqtisadi İnkişaf Nazirliyi yanında Sahibkarlığa Kömək Milli Fondu (SKMF) 2010-cu ilin birinci yarısında 48,391 milyon manatlıq 559 layihəni maliyyələşdirib. Bu barədə çərşənbə axşamı fondun rəsmi mətbuatda dərc olunmuş balansında bildirilib.
SKMF-nin güzəştli kreditləri hesabına maliyyələşdiriləcək bu layihələr 2144 yeni iş yerinin yaradılmasına kömək edəcək.
İlin birinci yarısında SKMF sənaye istehsalı və emalının müxtəlif sahələri üzrə ümumi məbləği 10,11 milyon manat olan 20 layihəni maliyyələşdirib. Kənd təsərrüfatı məhsullarının emalı sahəsində altı layihənin maliyyələşdirilməsi üçün 2,43 milyon manat, kənd təsərrüfatı məhsullarının istehsalı sahəsində 521 layihənin maliyyələşdirilməsinə 16,36 milyon manat, turizm sahəsində 2 layihənin maliyyələşdirilməsinə 2,5 milyon manat, xidmətlər sahəsinin inkişafı üçün 10 layihənin maliyyələşdirilməsinə 16,98 milyon manat ayrılıb.
Fond hesabat dövründə 7,06 milyon manatlıq (verilən kreditlərin ümumi portfelindən 14,6 faiz) 529 xırda kredit (kreditlərin ümumi sayından 94,6 faiz) verib. Hesabat dövründə 150 min manat məbləğində (0,3 faiz) bir orta kreidt (0,2 faiz) və 28,81 milyon manat məbləğində (18,2 faiz)14 böyük kredit (2,5 faiz), 32,36 milyon manat məbləğində (66,9 faiz) 15 iri kredit (2,7 faiz) verib.
İlkin proqnozlara görə, 2010-cu ildə 115 milyon manat məbləğində, eləcə də dövlət büdcəsi vəsaitləri hesabına 44 milyon manatlıq güzəştli kreditlərin veriləcəyi gözlənilir.
2010-cu ildə fond tərəfindən maliyyələşdirmə üçün prioritet istiqamətlər kənd təsərrüfatının inkişafı, yüngül və qida sənayesi seçilib.
2009-cu ildə SKMF səlahiyyətli kredit təşkilatları vasitəsilə 130 milyon manat həcmində 2100-dən artıq kredit verib. Beləliklə, keçən il 2008-ci illə müqayisədə SDMF-in vəsaitləri hesabına güzəştli kredit alan sahibkarların sayı 2,6 dəfə, kreditlərin həcmi isə 48% artıb.
SKMF 1992-ci ildə yaradılıb. Sahibkarlara kreditlərin verilməsi müvəkkil banklar və qeyri-kredit təşkilatları vasitəsilə həyata keçirilir. Onların ümumi sayı 36-dır.
Avqustun 10-da rəsmi məzənnə 0,8035 AZN/USD təşkil edir.