Azərbaycan, Bakı, 30 avqust /Trend, müxbir N.İsmayılova/
Sentyabrın ortalarında Dünya Bankının (DB) Avropa və Mərkəzi Asiya regionu üzrə vitse-prezidenti Filip Le Ueru ilk dəfə olaraq Bakıya səfərə gələcək. Bu barədə bazar ertəsi bankın Bakı nümayəndəliyindən bildiriblər.
Nümayəndəlikdən deyildiyinə görə, Le Ueru sentyabrın 12-dən 15-dək Bakıda olacaq və səfəri çərçivəsində sentyabrın 13-14-də ölkənin dövlət strukturlarında bəzi görüşlər keçirəcəyi gözlənilir. Bu, Le Uerunun Azərbaycana ilk səfəridir. Səfər çərçivəsində ölkədəki hazırkı vəziyyətlə tanışlıq planlaşdırılıb və Azərbaycan üzrə dörd il üçün hesablanan (2011-14-cü illər) əməkdaşlığın yeni strategiyasının müzakirəsi mümkündür.
Le Ueru Dünya Bankının Avropa və Mərkəzi Asiya regionu üzrə qrupunun vitse-prezidenti vəzifəsini 2009-cu iln avqustundan yerinə yetirməyə başlayıb.
Ölkə Dünya Bankının üzvü olduqdan sonra bankın Azərbaycan hökuməti ilə 1992-ci ildə başladığı əməkdaşlıqdan etibarən, DB 2,7 milyard dollar məbləğində 52 layihəni maliyyələşdirib. Bu vəsaitlərdən indiyədək 1,5 milyard dollar istifadə olunub.
