Azərbaycan, Bakı, 23 sentyabr /Trend, müxbir İ.Xəlilova/
Azərbaycanın suvarma-drenaj infrastrukturunun bərpası üçün təxminən 2-3 milyard manat lazımdır. Bu barədə cümə axşamı Dünya Bankının Azərbaycandakı irriqasiya layihəsinin həyata keçirilməsi qrupunun rəhbəri Akif Mustafayev deyib.
"Bu hesablamalar kənd təsərrüfatının inkişaf strategiyasının hazırlanması çərçivəsində aparılıb, - Mustafayev bildirib. - Məlum olduğu kimi, Azərbaycanda kolxoz və sovxozlar dağıldıqdan sonra müəyyən vaxt sahibsiz qalan irriqasiya-drenaj infrastrukturu sistemində daxili təsərrüfat şəbəkəsinin payı 80 faiz təşkil edir".
Halbuki "Azərbaycan Meliorasiya və Su Təsərrüfatı" ASC-nin balansında olan su təsərrüfatının böyük obyektləri dövlətin dəstəyi sayəsində qorunub.
"Hazırda magistral kanallar və kollektorlar vasitəsilə çatdırılan su daxili su təsərrüfatı şəbəkələrinin olmaması səbəbindən təyinatı üzrə bölüşdürülmür, - Mustafayev qeyd edib. - Bunula əlaqədar Azərbaycan hökuməti irriqasiya-drenaj infrastrukturunun bərpasını prioritet istiqamət hesab edir".
Lazımi vəsaitin cəlb olunması üçün hökumət Dünya Bankı, İslam İnkişaf Bankı, Beynəlxalq Kənd Təsərrüfatı İnkişaf Fonduna (IFAD) və digər donor təşkilatlara müraciət edib.
2003-cü ildən etibarən DB-nin kreditləri hesabına (bank layihələrin ümumi dəyəri 39,1 milyon dollar olmaqla 35 milyon dollar ayırıb) 11 rayonu əhatə edən irriqasiya layihəsi həyata keçirilib. Hazırda DB-dən layihəyə daha 22 rayonun qoşulması üçün 80 milyon dolların cəlb edilməsi planlaşdırılır.
Danışıqlar IFAD ilə birlikdə dörd rayonda suvarma-drenaj sisteminin bərpası üçün 100 milyon dollar ayırmağı planlaşdıran İslam İnkişaf Bankı ilə də aparılır. Buna qədər IFAD iki analoji layihənin maliyyələşməsində iştirak edib.
Hazırda Azərbaycanda becərilən ərazilərin sahəsi 1,4 milyon hektara yaxındır. Onların 14 faizi beynəlxalq təşkilatların kreditləri hesabına həyata keçirilən layihələr çərçivəsində əhatə olunub.
Sentyabrın 23-nə olan rəsmi məzənnə 0,803 AZN/USD təşkil edir.
