Azərbaycan, Bakı, 6 oktyabr /Trend, müxbir N.İsmayılova/
Azərbaycan bankı "AccessBank" kənd təsərrüfatının kreditləşməsi üzrə portfelini hər ay 4-5 milyon dollar artırır. Bu barədə bankın baş meneceri Endryu Pospilovski deyib.
"Kənd təsərrüfatı sektorundakı müştərilər digər sektorlardakı müştərilərdən daha intizamlıdırlar və bank qarşısında borclarını daha yaxşı ödəyirlər. Bu sektorun kreditləşməsində yüksək risk mövsümi amillərlə və ya pis məhsuldarlıqla əlaqədardır", - Pospilovski bildirib.
Onun sözlərinə görə, bu il Kür-Araz ovalığında daşqınlar nəticəsində vaxtın uzadılması payı artıb və bankın əksər müştəriləri ziyana düşüblər.
"Lakin biz hər halda risklərin idarə edilməsindən və bu sektordakı portfelin keyfiyyətindən razıyıq. Biz riskləri portfelin diversifikasiya edilməsi yolu ilə minimallaşdırırıq, yəni müxtəlif rayon və sektorları maliyyələşdiririk, nəticədə isə bizim kənd təsərrüfatı portfelimiz bütün ölkə üzrə eyni qaydada bölüşdürülüb", - o bildirib.
Onun sözlərinə görə, kənd təsərrüfatı sektoru ölkə iqtisadiyyatının inkişafı üçün vacib sahədir və bank bundan sonra da kənd təsərrüfatı sahəsindəki portfelini işləyəcək və genişləndirəcək. "AccessBank"ın kənd təsərrüfatı kreditləri üzrə portfeli 50 milyon dolları ötür, müştərilərinin sayı isə 35 min nəfərdir.
"АccessBank"ın missiyası aşağı və orta gəlirli Azərbaycan ailələrinə, eləcə də mikro və kiçik sahibkarlara maliyyə xidmətləri göstərməkdən ibarətdir. "АccessBank" beynəlxalq "Fitch" reytinq agentliyi tərəfindən Azərbaycan bankları arasında ən etibarlı bank adına layiq görülüb (BB+), həmçinin, "Euromoney" Nəşriyyat Qrupu tərəfindən "2010-cu ildə Azərbaycanın ən yaxşı bankı" kimi tanınıb. "AccessBank" 100% xarici kapitala malikdir və 6 beynəlxalq maliyyə institutuna məxsusdur. Bunlar Avropa Yenidənqurma və İnkişaf Bankı, Beynəlxalq Maliyyə Korporasiyası, Qara dəniz Ticarət və İnkişaf Bankı, Kfw Development Bank - Almaniya Hökumətinin İnkişaf Bankı (hər biri 20%), mikromaliyyələşdirmə sahəsində strateji maliyyəçi rolunda çıxış edən "Access Holding" (16,5%) və Almaniyanın LFS Financial Systems GmbH (3,5%) şirkətləridir.
