Azərbaycan, Bakı, 3 mart /Trend, müxbir N.İsmayılova/
Çirkli pulların yuyulması və maliyyə terrorizmi ilə mübarizə sahəsində Latviyanın qiymətləndirilməsinin dördüncü mərhələsi 2011-ci il mayın 9-14-də keçiriləcək. Qiymətləndirmədə Azərbaycan da iştirak edəcək. Bu barədə cümə axşamı Azərbaycan Mərkəzi Bankı (AMB) yanında Maliyyə Monitorinqi Xidmətindən verilən məlumatda deyilir.
"Azərbaycan ilk dəfədir çirkli pulların yuyulması və maliyyə terrorizmi ilə mübarizə sahəsində hüquqi və institusional aspektlərin qiymətləndiricisi kimi çıxış edir. Milli sistemlərin qiymətləndirilməsində MONEYVAL-ın üzvü olan ölkələrdən üç ekspert və FATF üzvü olan ölkələrdən bir ekspert iştirak edir", - məlumatda deyilir.
MONEYVAL 2010-cu ildən struktura daxil olan üzvlərin milli sistemlərinin qiymətləndirilməsinin dördüncü mərhələsini həyata keçirir. Sloveniya və Macarıstan artıq bu proseduru başa vurublar. Azərbaycanın qiymətləndirilməsi MONEYVAL-ın 2013-cü il üzrə iş planına salınıb. Bu qiymətləndirmə çirkli pulların yuyulması və maliyyə terrorizmi ilə mübarizə sahəsində sistemlərin effektivliyini və qanunvericiliyin praktiki tətbiqini əhatə edir.
AMB yanında Maliyyə Monitorinqi Xidməti 2009-cu il fevralın 23-də Azərbaycan Prezidenti İlham Əliyevin müvafiq sərəncamı ilə yaradılıb. Xidmətin monitorinqləri kredit təşkilatları, sığorta və təkrar sığorta təşkilatları, qiymətli kağızlar bazarının peşəkar iştirakçıları, kredit təşkilatlarının peşəkar iştirakçıları, kredit təşkilatlarının lizinq xidmətləri, poçt şöbələri və digər təşkilatlar vasitəsilə pul köçürmələri, lombardlar, sərmayə fondları, qiymətli metal və daşlarla bağlı sövdələşmələr və onlardan düzəldilmiş məmulatlar, qeyri-hökumət və dini təşkilatlar, lotereya təşkilatçıları, daşınmaz əmlak alqı-satqısı xidməti göstərən şəxslər (rieltorlar), vəkillər, auditorlar, daşınmaz əmlakla bağlı sövdələşmələr, müştəri vəsaitləri, qiymətli kağızlar və əmlak, müştəri bank və depohesabları əhatə edir.
