...

Azərbaycanda bədbəxt hadisələrdən sığortanın əhatəsi ilin sonunadək 80 faiz təşkil edəcək - Dövlət Sığorta Nəzarəti Xidməti

Biznes və iqtisadiyyat xəbərləri Materials 16 Mart 2011 17:04 (UTC +04:00)

Azərbaycan, Bakı, 16 mart /Trend, müxbir Ü.İsmayılova/

Azərbaycanda istehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığortanın əhatəsi ilin sonunadək 80 faiz təşkil edəcək. Trend-in məlumatına görə, bu barədə Azərbaycan Maliyyə Nazirliyi yanında Dövlət Sığorta Nəzarəti Xidmətinin rəhbəri Namiq Xəlilov jurnalistlərə bildirib.

"Sığortanın bu növü üzrə mükafatlar tədricən artır. Belə ki, onlar fevralda yanvara nisbətən çox idi, martda isə yanvar və fevral aylarını birgə götürdükdə, çox olacaq", - Xəlilov deyib.

Onun sözlərinə görə, sığortanın bu növünün inkişafı üçün mühüm tədbir prosesə yeni sığorta şirkətlərinin, sığortaçıların və artıq regiona çıxan şirkətlərin cəlb edilməsidir.

"Bu qanun olmasaydı, həyat sığortası şirkətlərinin açılmasına bu qədər namizəd olmazdı, həyat sığortası xidmətlərinin regionlara yayılması olmazdı", - Xəlilov deyib.

Bazarda həyat sığortası şirkətlərinin sayına toxunan Xəlilov deyib ki, bazarda 20 həyat sığortası şirkəti mövcud ola bilər, lakin onlar dar çərçivədə işləyəcək və bütün potensialı əhatə etmək imkanına malik olmayacaqlar. Bütün müştəri bazasını əhatə etməklə, yeni müştərilər cəlb etməklə fəal surətdə bu xidmətləri göstərən cəmi 5-6 şirkətin işləməsi də mümkündür.

Bu gün Azərbaycanda həyat sığortası üzrə cəmi üç - Atəşgah Həyat, Qala Həyat və PAŞA Həyat şirkətləri fəaliyyət göstərir. Maliyyə Nazirliyinin məlumatına görə, martın 1-də istehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta üzrə yığımlar 1,957 milyon manat təşkil edib.

Hazırda Dövlət Sığorta Nəzarəti Xidməti həyat sığortası şirkətinin yaradılması üzrə bir neçə təklifi nəzərdən keçirir.

Martın 16-na olan rəsmi məzənnə 0,7933 AZN/USD təşkil edir.

Xəbər lenti

Xəbər lenti