Azərbaycan, Bakı, 3 may /Trend, müxbir N.İsmayılova/
Əbu-Dabi İnkişaf Fondu 760 meqavatlıq "Cənub" istilik elektrik stansiyasının (İES) tikintisi üçün 60,7 milyon dollar həcmində kredit ayıracaq. Bu barədə çərşənbə axşamı Azərbaycanın iqtisadi inkişaf naziri Şahin Mustafayev məlumat verib.
"Tezliklə kredit sazişinin imzalanması gözlənilir", - Mustafayev deyib.
Onun sözlərinə görə, Əbu-Dabi İnkişaf Fondu Azərbaycandakı infrastruktur layihələrinin reallaşdırılmasının fəal iştirakçısıdır.
O bildirib ki, bundan əvvəl fond Azərbaycanda avtomagistralların tikintisinə 10 milyon dollar məbləğində vəsait ayırıb.
Layihənin ümumi dəyəri 664,1 milyon avro həcmində qiymətləndirilir. İndiyədək (AMB-nin kreditləri cəlb edilənədək) maliyyələşməyə 494 milyon avronun alınması bəyənilib.
Bu layihənin maliyyələşdirilməsi üçün üç bankın - "Bayerische Landesbank", "Societe Generale" və "Credit Suisse" konsorsiumundan artıq 300 milyon avro maliyyə vəsait alınıb. Kredit dövlət zəmanəti ilə 10 il muddətinə verilib. Bank konsorsiumunun kredit resursları stansiyanın tikintisi ilə bağlı olan işlərin xərcinin yarısını ödəyəcək.
İslam İnkişaf Bankı (İİB) bu il oktyabrın 20-də maliyyələşmənin 134 milyon avro məbləğinə razılıq vermişdi. Bundan başqa, OPEC-in Beynəlxalq İnkişaf Fondu 20 milyon dollar ayrılmasını təsdiq edib, bununla əlaqədar 2010-cu ilin iyulunda kredit sazişi imzalanıb.
"Cənub" stansiyası həm qazla, həm də mazutla işləyəcək.
Mayın 3-nə olan rəsmi məzənnə 0,7913 AZN/USD təşkil edir.
