Azərbaycan, Bakı, 31 may /Trend, müxbir İ.Xəlilova/
2011-ci ilin yekunları üzrə Azərbaycan Mərkəzi Bankı (AMB) iqtisadiyyatın tələbatından asılı olaraq ölkənin bank sektorunun kredit fəallığının artacağını gözləyir. Bu barədə Trend-ə çərşənbə axşamı AMB-nin baş direktoru Xaqani Abdullayev deyib.
"Dünya maliyyə böhranından sonra banklar risklər baxımından mühafizəkar siyasət aparır, satış likvidliyini toplayır və öz kredit siaysətlərində daha ehtiyatlıdırlar", - Abdullayev bildirib.
Hazırda kreditlərin və depozitlərin artım tempi arasında böyük fərq var, lakin "indi bankların vəsaitlərinin şaxələndirilməsi üzrə planların dəyişməsi mümkündür və onlar likvid vəsaitlərinin xeyli hissəsini real sektorun kreditləşdirilməsində toplayırlar, bu isə tədricən həyata keçiriləcək".
2011-ci ilin birinci rübü ərzində iqtisadiyyatın bank kreditləşməsi üzrə real faiz dərəcəsi 1,18 faiz bənd, bankların kredit portfeli isə 8,7 faiz azalıb. Aprelin 1-nə ölkə banklarının kredit portfelinin həcmi 8366 milyon manat təşkil edib və yeni kreditlərin verilməsi bankların kredit portfelinin 3,51 faizi səviyyəsində olub, kredit bazarından vəsaitlərin xalis çıxarılması toplanmış portfelin 10,4 faizi səviyyəsində olub.
2011-ci ilin əvvəlindən Azərbaycan banklarının real depozit faizi 2,7 dəfə azalıb. Bu, rüb ərzində depozit bazasının 1,5 faiz artmasına mane olmayıb.
Aprelin 1-nə bankların depozit bzası 5532,3 milyon manat təşkil edib. Bu göstərici ilin əvvəlində 5448,8 milyon manat olub. Bu halda hüquqi şəxslərin depozitləri 2243,2 milyon manat təşkil edib. İlin əvvəlində bu göstərici 2419 milyon manat olub. Əhalinin əmanətləri (fiziki şəxslərin) isə əksinə, hesabat dövrü ərzində 3029,8 milyon manatdan 3289,1 milyon manatadək artıb.
"2011-ci ildə bütün vaxtı ötmüş kreditlərin xüsusi çəkisi ötən il olduğu kimi, 4-5 faiz səviyyəsində gözlənilir və problemli kreditlərin payının artacağını gözləmirik, - Abdullayev qeyd edib. - 2009-cu ildə bu göstəricinin artım halları olub, lakin adekvat siyasət nəticəsində AMB buna imkan verməyib".
Aprelin 1-nə bütün vaxtı ötmüş kreditlərin xüsusi çəkisi bankların kredit portfelinin 6,5 faizini təşkil edib. Bu göstərici ilin əvvəlində 5,4 faiz olub.
Mayın 31-nə olan rəsmi məzənnə 0,7894 AZN/USD təşkil edir.
