Azərbaycan, Bakı, 1 sentyabr /Trend, müxbir N.İsmayılova/
SECO Azərbaycan üçün ümumi dəyəri 3,5 milyon dollar olan 3 yeni layihəni təsdiq edib. Bu barədə Trend-ə cümə axşamı İsveçrənin İqtisadi Əməkdaşlıq üzrə Dövlət Katibliyinin (SECO) Bakı ofisindən bildirilib.
Məlumatda bildirilir ki, SECO "Azərpoçt" dövlət poçt operatoruna 600 min dollar məbləğində texniki dəstək, Qiymətli Kağızlar üzrə Dövlət Komitəsinə kapital bazarının müasirləşdirilməsi layihəsi üçün 1,6 milyon dollar, maliyyə xidmətləri istehlakçılarının hüquqlarının müdafiəsi və Maliyyə Nazirliyi, Mərkəzi Bank və Qiymətli Kağızlar üzrə Dövlət Komitəsi ilə birgə həyata keçirilən layihə çərçivəsində maliyyə təlimi layihəsi üçün 1,3 milyon dollar ayrılmasını təsdiq edib. Bütün layihələr 5 il müddətinə nəzərdə tutulub və Dünya Bankı ilə birgə həyata keçirilir.
"Maliyyə xidmətlərinin inkişafı" layihəsi 2005-ci ildən Dünya Bankının dəstəyi ilə Azərbaycan hökuməti tərəfindən həyata keçirilir. Bu layihənin 2009-cu ildə başa çatdırılması planlaşdırılmışdı, lakin texniki işlərin müəyyən edilmiş müddətədək başa çatmaması ilə əlaqədar olaraq layihə daha bir il uzadılıb. Yeni texniki yardımın göstərilməsi çərçivəsində SECO treninqlərin keçirilməsinə kömək edəcək, eləcə də poçt operatorunun dizaynının dəyişdirilməsini və məhsullarının rebrendinqini maliyyələşdirəcək.
Dünya Bankı kapital bazarının müasirləşdirilməsi layihəsi üçün 12 milyon dollar ayırıb; SECO bu layihənin bir ünsürünü - kapital bazarı iştirakçılarının imkanlarının möhkəmləndirilməsi və bazar müəssisələrinin inkişafı layihəsini maliyyələşdirir.
