Azərbaycan, Bakı, 6 fevral /Trend, müxbir N.İsmayılova/
Azərbaycanın bankı "Kapital Bank" 2012-ci ildə bütün struktur bölmələrinin vahid korporativ üsluba uyğunlaşdırılması, müştərilərə xidmət şəraitinin yaxşılaşdırılması, mövcud infrastrukturun təkmilləşdirilməsini qarşıya məqsəd qoyub. Bu barədə bazar ertəsi Trend-ə bankın mətbuat xidmətindən məlumat verilib.
"2012-ci ildə bankın əsas məqsədləri indiyə qədər qazandığı nailiyyətləri qorumaq, ölkənin bank-maliyyə sektorunda aparıcı mövqeyini möhkəmləndirmək, xarici maliyyə bazarlarına inteqrasiya üçün sağlam maliyyə vəziyyətini təsdiq edən reytinqlər əldə etmək olacaq", - bankdan qeyd ediblər.
"Kapital Bank" bu il də korporativ idarəetmə standartlarının tələblərinə cavab verən riskləri idarəetmə sisteminin yaradılmasını davam etdirəcək.
"Bank hazırda istehsalat, emal, tikinti, energetika və rabitə sahələrinə irihəcmli kreditlər verir və öz aktivlərinin iqtisadiyyatın müxtəlif sahələrində optimal həcmdə yerləşdirilməsinə çalışır", - bankdan deyiblər.
Bankdan verilən məlumata görə, "Kapital Bank" 2012-ci ildə neft-qaz hasilatı və emalı, eləcə də kimya sənayesi müəssisələrinin, neft-qaz sənayesi üzrə xidmət sahələrinin, maşınqayırma, metallurgiya, telekommunikasiya, tikinti kompleksi, nəqliyyat, kənd təsərrüfatı məhsullarının istehsalı və emalı ilə məşğul olan müəssisələrin kreditləşməsinə xüsusi diqqət yetirəcək.
"Bununla yanaşı, bank təbii ki, digər sahələrin kreditləşdirilməsi, iri və kiçik sahibkarlıq fəaliyyəti ilə məşğul olan hüquqi və fiziki şəxslərin fəaliyyətinin dəstəklənməsini də davam etdirəcək", - bankdan bildiriblər.
"Kapital Bank" hazırda beynəlxalq mühasibat uçotu sisteminin tətbiqi üzrə intensiv işlər aparır və gözlənilir ki, yaxın zamanlarda yeni uçot standartlarının tətbiqinə başlanacaq. Müştərilərə göstərilən xidmətin keyfiyyətinin monitorinqi sisteminin tətbiqi, pərakəndə bankçılıq təcrübəsinin genişləndirilməsi, kompleks bank məhsul və xidmətlərinin təklif edilməsi, işin səmərəliliyinin yüksəldilməsi də bankın 2012-ci il üçün qarşıya qoyduğu strateji məqsədlər sırasındadır.
"Eyni zamanda, təkmilləşdirilmiş idarəetmə modellərinin yaradılması, bazara yeni innovasiya məhsullarının çıxarılması, əməliyyatların tam avtomatlaşdırılması və onların təhlükəsizliyinin təmin edilməsi bankın məqsədlərindən biridir", - bankdan deyiblər.
2011-ci ilin sonuna olan məlumata görə, "Kapital Bank" aktivlərin həcmi və pərakəndə depozitlər üzrə Azərbaycanın ən iri ikinci bankıdır.
2011-ci ilin yekunları üzrə bankın aktivləri 1320,9 milyon manat təşkil edib. Ötən il ərzində bankın nizamnamə kapitalı 40 milyon manata qədər artırılıb. 2012-ci ilin yanvarın 1-nə olan vəziyyətə görə, bankın kredit portfeli 963,6 milyon manat, depozit portfeli isə 464,75 milyon manat təşkil edib.
Hazırda "Kapital Bank"ın əsas səhmdarı "Pasha Holding"dir. Holdinqə səhmlərin 97,75 faizi məxsusdur.
Fevralın 6-na olan rəsmi məzənnə 0,7863 AZN/USD təşkil edir.