Azərbaycan, Bakı, 10 sentyabr /Trend, müxbir E.Əliyev/
Son 10 il ərzində yol və digər nəqliyyat infrastrukturlarına daxili və xarici maliyyə mənbələrindən 8 milyard 300 milyon manat vəsait cəlb edilib. Trend-in məlumatına görə, bu barədə çərşənbə axşamı maliyyə naziri Samir Şərifov hakim Yeni Azərbaycan Partiyasının rəsmi saytına müsahibəsində deyib.
Onun sözlərinə görə, bunun sayəsində ölkəmizdə ümumi uzunluğu 3 min 296 kilometr olan yollar tikilib, yenidən qurulub və əsaslı təmir olunub ki, bunun da 1 min 115 kilometrini respublika əhəmiyyətli, 2 min 181 kilometrini isə yerli əhəmiyyətli yollar təşkil edir.
Nazir qeyd edib ki, ölkədə yol və digər nəqliyyat infrastrukturlarının tikintisi, yenidən qurulması və əsaslı təmiri işlərinin əhatə dairəsi həcmi və maliyyə tutumu digər sahələrdə aparılan adekvat işləri xeyli üstələyib.
S.Şərifov bildirib ki, əhalinin şəxsi istifadəsində olan nəqliyyat vasitələrinin sayı 916 min 431 ədəd olmaqla 2003-cü ilə nisbətən 530 min 212 ədəd və yaxud 2,4 dəfə artıb: "Son statistik məlumatlara əsasən, cari ilin 6 ayında ölkəmizə 43 min 186 ədəd minik avtomobili idxal olunub ki, bu da ötən ilin eyni dövrü ilə müqayisədə 5 min 860 ədəd və ya 15,7 faiz çoxdur".
Nazirin sözlərinə görə, Bakı şəhəri ərazisində 32 ədəd ümumi uzunluğu 9 min 575 poqonmetr olan müxtəlif səviyyəli yol qovşağı, 60 ədəd ümumi uzunluğu 4 min 25 metr olan yeraltı və yerüstü piyada keçidləri tikilib, yenidən qurulub və əsaslı təmir olunub.
S.Şərifov deyib ki, Bakı şəhərinin nəqliyyat şəbəkəsində müstəsna əhəmiyyət kəsb edən Bakı Metropoliteninə 1 milyard 500 milyon manat vəsait ayrılmaqla ümumi uzunluğu 4,8 kilometr olan yeraltı metro xətləri çəkilib, 3 metro stansiyası tikilərək istifadəyə verilib, 3 stansiyada yenidənqurma işləri aparılıb, metronun vaqon parkı 76 ədəd yeni vaqonla təchiz edilib və hazırda 5 stanstiyanın tikintisi işləri (uzunluğu 4,9 kilometr) aparılır.
