Azərbaycan, Bakı, 3 fevral /Trend, müxbir A.Axundov/
2013-cü il ərzində Bakıda bazara təklif azalıb: dekabrda satışa ötən ilin əvvəlindəki 817 hektara qarşı 738 hektar torpaq sahəsi çıxarılıb. Bu barədə bazar ertəsi Trend-ə "MBA Group" konsaltinq şirkətinin baş direktoru Nüsrət İbrahimov bildirib.
Ekspertin sözlərinə görə, dekabrda satışa çıxarılan torpaq sahələrinin 90,9 faizini boş sahələr, qalanını isə qeyri-yaşayış sahələri və köhnə yaşayış sahələri təşkil edib.
2013-cü ilin birinci yarısında təklifdə mayda 1072 hektar torpaq sahəsi həddinə çataraq artım tendensiyası müşahidə olunurdu, ancaq sonra azalma başlandı. Təklifin azalması yalnız noyabrda başa çatdı. İbrahimovun fikrincə, belə vəziyyəti tikinti üçün mövsüm olmayan ayların gəlməsi və torpaq bazarında fəallığın azalması ilə izah etmək olar.
Yeni tikililərin 20,2 faizi sökülən yararsız evlərin yerində, 5,5 faizi sənaye və məişət obyektlərinin yerləşdiyi torpaqlarda, qalan hissəsi isə yeni alınan ərazilərdə tikilib. Dekabrda satışa təklif olunan torpaq sahələrinin orta sahəsi 26,5 sot təşkil edib.
Bazarda torpağın ekspozisiya müddəti ilin ortasında ciddi azalmaya baxmayaraq, (iyulda torpaq sahələri orta hesabla 301 gün ərzində satılıb) illik ifadədə cüzi dəyişib (2013-cü ilin yanvarında 337 gün, dekabrda 332 gün).
