Azərbaycan, Bakı, 6 mart /Trend, müxbir E.İsmayılov/
ARDNŞ Bakının Lökbatan qəsəbəsində baş verən kütləvi zəhərlənmə ilə bağlı rəsmi məlumat yayıb.
Trend-in ARDNŞ-nin saytına istinadən verdiyi məlumata görə, martın 5-də, səhər saat 10:30-da cari təmir işləri ilə əlaqədar olaraq Bakının Lökbatan qəsəbəsinə gedən boru xəttində qaz təchizatı dayandırılmışdır. Həmin gün saat 18:00 radələrində təmir işləri başa çatdırılmış və xəttə təbii qazın verilişi bərpa olunmuşdur. Mövcud normativlərə əsasən, qaz sızmasının vaxtında aşkar edilməsi və itkinin qarşısının alınması məqsədi ilə "mavi yanacağ"ın tərkibinə vurulan kəskin qoxulu odorant maddəsinin təsirindən Lökbatan qəsəbəsində V.Əsgərov küçəsindəki bir neçə yaşayış binasının sakinlərində ürəkbulanma halları müşahidə olunmuşdur.
Baş vermiş hadisə ilə əlaqədar ARDNŞ-də mütəxəssislərdən ibarət komissiya yaradılmış və araşdırma işlərinə başlanılmışdır. Hazırda Komissiya tərəfindən baş vermiş kütləvi ürəkbulanma hallarının mümkün səbəbləri ilə əlaqədar bir neçə versiya üzərində iş aparılır. Komissiyanın yekun rəyi hazır olan kimi ictimaiyyət üçün açıqlanacaqdır.
ARDNŞ bildirir ki, şirkətin və Fövqəladə Hallar Nazirliyinin birgə qərarına əsasən, Azərbaycan Respublikası ərazisində mövcud olan bütün qazpaylayıcı stansiyalarda odorant qurğuları quraşdırılmalıdır. Hazırda ölkə üzrə istismar olunan 205 qazpaylayıcı stansiyadan 178-də belə qurğular quraşdırılmışdır. ARDNŞ tərəfindən sonuncu dəfə alınmış bu qurğulardan biri də Lökbatan qəsəbəsində quraşdırılmışdır.
Qeyd edək ki, nüfuzlu mütəxəssislərin rəyinə əsasən, odorant (metilmerkartan və onun homoloqu etilmerkaptan) qoxusu olmayan, insan orqanizminə və ətraf mühitə təhlükə yaradan, partlayış verə bilən qazların sızmasını tez müəyyən etmək üçün bu qazlara qarışdırılan qoxu verən maddədir. Odorantın qazlara qarışdırılması müəyyən qatılıqda aparılır. Məişətdə istifadə olunan təbii qaz qoxusuz olduğuna görə təhlükəsizlik baxımından bu qazlara qarışdırılan odorantlar (metilmerkartan və onun homoloqu etilmerkaptan) rəngsiz və kəskin iyli, havadan 1,7 dəfə ağır olan qazlardır. Yaşayış zonalarında odorantın havada buraxıla bilən qatılıq həddi 0,00001 mq/m3-dir. Bu maddənin havada konsentrasiyası 20 mq/m3 olduqda insan orqanizmi üçün heç bir təhlükəli təsiri yoxdur, zəhərlənmə yaratmır, sadəcə ürəkbulanma yarada, nəfəs yollarını qıcıqlandıra bilər. Odorantın insan orqanizminə ciddi təsiri halları qeydə alınmamışdır. Bu maddə qaz yanarkən tam yanır. (İstinad olunan mənbə: М.В.Лазарев, "Вредные вещества в промышленности" часть I. Ленинград 1954).
Xatırladaq ki, bu fakt zamanı 115 nəfər zəhərlənib.