Azərbaycan, Bakı, 26 avqust /Trend, müxbir Zülfiyyə Qurbanova/
"Qafqaz İnkişaf Bankı - Gürcüstan" SC-nin (Azərbaycanın "Qafqaz İnkişaf Bankı" ASC-nin törəmə strukturu) aktivləri bu ilin ikinci rübünün yekunları üzrə 22,75 milyon lari təşkil edib. Bu barədə Trend-ə Gürcüstan Milli Bankından bildiriblər.
İl ərzində bankın aktivlərinin həcmi 44,6 faiz artıb. Bu göstərici ötən ilin ikinci rübündə 15,73 milyon lari olub. Bankın aktivlərinin 67 faizindən çoxu milli valyutada, qalan hissəsi isə (7,48 milyon lari) SDV-də yerləşdirilib. Pul vəsaitlərində və onların ekvivalentlərində 462,3 min lari toplanıb ki, bu da ötən ilin ikinci rübündəkindən 2,3 dəfə çoxdur.
İl ərzində bankın kredit portfeli 49,3 faiz artaraq 7,97 milyon lari təşkil edib. Müqayisə üçün: 2013-cü ilin iyun ayının yekunları üzrə bu göstərici 5,34 milyon lariyə bərabər olub. Bankın verdiyi kreditlərin 47 faizdən çoxunu (3,75 milyon lari) milli valyutada borclar təşkil edir. SDV-də 4,23 milyon lari ekvivalentində kredit verilib.
"Qafqaz İnkişaf Bankı - Gürcüstan" SC-nin kredit portfelinin strukturunda ehtiyatların həcmi bu ilin iyun ayının yekunları üzrə 1,39 milyon lari təşkil edib.
Hesabat dövrünün yekunları üzrə bankın öhdəliklərinin ümumi həcmi il ərzində 8,9 dəfə artaraq 7,76 milyon lari olub. Strukturda cari hesablarda yerləşdirilən vəsaitlərin passivləri il ərzində 5,2 dəfə artaraq 1,07 milyon lari təşkil edib. Bank 5,34 milyon lari həcmində təcili depozitlər cəlb edib ki, bundan SDV-də əmanətlərin payına 5,32 milyon lari, milli valyutada depozitlərin payına isə 23,9 min lari düşüb.
"Qafqaz İnkişaf Bankı - Gürcüstan" SC-nin nizamnamə kapitalı bu ilin iyun ayının sonuna 14,82 milyon lari olub. Bankın məcmu kapitalı 14,99 milyon lariyə (o cümlədən 163,63 min lari bölüşdürülməyən mənfəət) bərabər olub. Onun həcmi il ərzində 0,9 faiz artıb. Müqayisə üçün: 2013-cü ilin birinci rübündə bu göstərici 14,86 milyon lari təşkil edib.
İkinci rübün yekunları üzrə bankın xalis faiz gəliri 567,83 min lari olub ki, bu da ötən ilin eyni dövründə əldə olunandan 5,5 dəfə (102,67 min lari) çoxdur.
Bank ikinci rübü 74,97 min lari həcmində xalis mənfəətlə başa vurub.
"Qafqaz İnkişaf Bankı" ASC 1996-cı il aprelin 23-də Qafqaz ölkələrinin sosial-iqtisadi inkişafının sürətləndirilməsi üzrə məsələlərin həlli üçün yaradılıb. Gürcüstanda törəmə bank 2006-cı ilin ortalarında fəaliyyətə başlayıb.
