Azərbaycan, Bakı, 22 oktyabr /Trend, müxbir Emil İsmayılov/
Gürcüstanın Abxaziya separatçı regionu vasitəsilə Rusiya ilə dəmiryol əlaqəsinin bərpası ikitərəfli gürcü-abxaz münasibətləri məsələsidir. Trend-in məlumata görə, bu barədə Bakıda keçirilən MDB və Baltikyanı ölkələrin Dəmiryol Nəqliyyatı Şurasının 61-ci iclası çərçivəsində jurnalistlərə "Rusiya Dəmir Yolları" ASC-nin rəhbəri Vladimir Yakunin deyib.
Onun sözlərinə görə, bu dəmiryol xətti bərpa ediləcəyi təqdirdə, təbii ki, Ermənistan da Gürcüstan ərazisi vasitəsilə dəmiryolla Rusiyaya giriş əldə edə biləcək: "Mən ən azından bu danışıqlarda iştirak etmirəm, amma bilirəm ki, Gürcüstan tərəfini təmsil edən həmkarlarım mənim yanıma gəlirlər və deyirlər ki, onlar dəmiryolun bu hissəsinin açılması üçün Abxaziya tərəfi ilə danışıqlar aparmağa çalışırlar. Bu, əlbəttə, ikitərəfli əlaqələr məsələsidir [...] "Rusiya Dəmir Yolları" hazır olduğunu artıq çoxdan deyib".
Abxaziya vasitəsilə Gürcüstan və Rusiya dəmiryolları əlaqəsi ötən əsrin 90-cı illərində SSRİ-nin süqutu ilə bağlı Qafqazda kəskinləşən münaqişələrdən biri ilə əlaqədar kəsilib.
