Bakı. Samir Əli - Trend:
Ələt - Astara - İran dövlət sərhədi avtomobil yolunun tikintisi yekunlaşmaq üzrədir. "Azəravtoyol" Açıq Səhmdar Cəmiyyətindən Trend-ə verilən məlumata görə, yeni yolun uzunluğu 174 km-dir.
Layihə çərçivəsində yeni yol 1b texniki dərəcəyə uyğun olaraq inşa olunur. Yol 2 gediş və 2 gəliş olmaqla 4 hərəkət zolağından ibarətdir. Yol yatağının eni 26.5 metr təşkil edir. Yolun hərəkət hissəsinin eni 15 m, hərəkət zolaqlarının eni 3.75 m, ayırıcı zolağın eni 4 m, hər iki istiqamət üzrə çiyinlərin eni isə 3.75 m-dir. Yol geyiminin qalınlığı isə 1 m 12 sm-dir ki, burada hamarlayıcı lay - 50 sm, əsasın alt layı - 20 sm, əsasın qırmadaş layı - 15 sm, bitumlu əsas layı - 14 sm, əlaqələndirici asfalt layı - 8 sm, üst aşınma layı - 5 sm-dir.
Yolda ümuilikdə asfalt-beton örtük 27 sm təşkil edəcək. Sözügedən avtomobil yolu bir neçə hissə üzrə inşa olunur. Həmin istiqamətlər Yenikənd-Salyan-Şorsulu (31-80.6 km), Şorsulu-Cəlilabad (80.6-110.7 km), Cəlilabad-Masallı (110.7-142.9 km), Masallı-Astara (142.9-205 km) iatiqaməti üzrədir.
Yuxarıda sadalanan hissələr üzrə 30.1 km-lik Şorsulu-Cəlilabad hissəsi istisna olmaqla tikinti işləri tam olaraq bu ilin sonu, gələn ilin əvvəllərində yekunlaşdırılacaq. Bu hissələr üzrə yerinə yetirilmiş iş həcmi ümumilikdə 90% təşkil edir. Yolun 80.6-110.7-ci km-lik hissəsini əhatə edən Şorsulu-Cəlilabad hissəsində tikinti işlərinə ötən il başlanılıb və 2019-cu ildə yekunlaşdırılması nəzərdə tutulub. Bu hissədə faktiki tərəqqi 50%-dir.
Yeni Ələt-Astara avtomobil yolunun tikintisi layihəsi çərçivəsində yol boyu 692 dairəvi və düzbucaqlı su keçidinin, 69 yeraltı keçidin, 47 körpünün və 3 qovşağın tikintisi nəzərdə tutulub ki, sadalanan əksər mühəndis qurğusu artıq tikilərək istifadəyə tam hazır vəziyyətə gətirilib.
Hazırda Yenikənd-Salyan-Şorsulu, Cəlilabad-Masallı və Masallı-Astara hissələri üzrə son tamamlanma işləri həyata keçirilir. Daha dəqiqi, yolun Yenikənd-Salyan-Şorsulu hissəsində asfalt-beton örtüyünün döşənməsi, boruların uzadılması və yamaclarının dəmir-betonla bərkidilməsi, alt keçidlərin əks-dolğusu, yamaclara münbit torpağın verilməsi və ayırıcı zolaqda dəmir-beton baryerlərin qoyulması işləri aparılır.
Cəlilabad-Masallı və Masallı-Astara hissələrində isə asfalt-beton örtüyünün son qatının döşənməsi, körpülərdə tamamlanma, boruların tikintisi və mühafizəsi, çəpər çəkmə və baryerlərin qoyulması, yolun işıqlandırılması işləri görülür. Sadalanan işlər bitdikdən sonra yolun nişanlanması və işarələnməsi işlərinə başlanılacaq.
Bütün işlər tərtib olunmuş qrafikə uyğun və texnoloji ardıcıllığa riayət olunmaqla “Azəravtoyol” ASC-nin rəhbərliyinin nəzarəti altında yüksək keyfiyyətlə aparılır. Bunun üçün əraziyə lazımi sayda qüvvə cəlb olunub.
Qeyd edək ki, hazırda mövcud olan Ələt - Astara - İran dövlət sərhədi avtomobil yolunun ümumi uzunluğu 243 km təşkil edir. İnşası aparılan yeni yol istifadəyə verildikdə isə bu məsafə 38 km qısalaraq 205 km olacaq. Böyük əhəmiyyətə malik yolun tikintisi turizmin və kənd təsərrüfatının inkişafına gətirib çıxaracaq.
Bundan başqa, şimaldan cənuba doğru və əksinə avtomobil yükdaşımaları dəhlizinin əsas elementlərindən biri olan Ələt-Astara avtomobil yolu ilə daşımaların daha rahat şəkildə həyata keçirilməsi mümkün olacaq. Bu amil isə yükdaşımaların həcminin artmasına gətirib çıxaracaq.