Avropa Yenidənqurma və İnkişaf Bankı (AYİB) "Qaradağsement"in fəaliyyətini dəstəkləməyə hazırdır və sement zavoduna kredit verilməsi məsələsi müzakirə prosesindədir. Trend in məlumatına görə, bu barədə jurnalistlərə AYİB-in prezidenti Jan Lemyer məlumat verib. Onun sözlərinə görə, sement sənayesi ölkənin gələcəyində çox böyük rol oynayır və buna görə də bank Azərbaycanda yeganə sement istehsalçısını dəstəkləmək niyyətindədir. Lakin "Qaradağsement"i 1999-cu ildə özəlləşdirən İsveçrənin Holcim şirkəti ilə danışıqlar hələlik çox erkən mərhələdədir.
Avropa Bankının rəhbəri hesab edir ki, sement sənayesi Azərbaycan üçün çox vacib sahədir və onun inkişafı üçün idarəetmə ilə bağlı şərait yaradılmalı, bu müəssisənin inkişafına mane olmamalı, korrupsiya ilə mübarizə aparılmalı və yaxşı şəffaf inzibati sistem yaradılmalıdır.
Aprelin 25-də AYİB-in Direktorlar Şurasında "Qaradağsement"in səhmlərinin 20%-nin $10 mln-a alınması məsələsi nəzərdən keçiriləcək. Bu gün səhmlərin 89,4% -i Holcim şirkətinin, qalanları isə xırda səhmdarların nəzarətindədir. 2010-cu ilə kimi sement zavodu Avropanın ekoloji standartlarına daxil olmaq istəyir. Bunun üçün onun yenidənqurulması üçün $100-110 mln vəsait tələb olunur.