Azərbaycanda investisiya imkanlarını müzakirə etmək üçün Hindistanın Sənaye Konfederesiyası Azərbaycana öz biznes nümayəndə heyətini göndərir. Nümayəndə heyətinin Bakıya səfəri oktyabrın 4-dən 6-dək davam edəcək.
Trend in xəbər verdiyi kimi, ikitərəfli danışıqlar Azərbaycan-Hindistan münasibətlərinin yaxşılaşdırılması üçün əməkdaşlığın genişləndirilməsinə və investisiyaların cəlb edilməsinə yönəldiləcək.
Səfər iqtisadi və texniki əməkdaşlıq üzrə mütəmadi məsləhətləşmələr haqqında 1998-ci ildə imzalanmış sazişlər çərçivəsində baş tutacaq.
Hindistanın biznes nümayəndə heyətinin Bakıya ikigünlük səfəri Qafqaz regionuna, xüsusilə Azərbaycana çıxış üzrə uzunmüddətli strategiyanın həyata keçirilməsi kimi nəzərdən keçirilə bilər.
Səfər çərçivəsində Hindistanın Sənaye Konfederasiyası və Azərbaycanın Sənaye və Ticarət Palatası arasında qarşılıqlı anlaşma haqqında memorandumun imzalanması nəzərdə tutulub.
Səfər zamanı Hindistan tərəfi, habelə, Azərbaycanın telekommunikasiya sektorunda, İT-təhsil sahəsində, neft və qaz sahəsində yeni layihələrdə, səhiyyə sahəsində, nəqliyyat sektorunda, avtomobil hissələri, tibbi, hasilat və kənd təsərrüfatı üçün avadanlıqların tədarükündə iştirak imkanlarını müzakirə etmək niyyətindədir.
2006-cı ilin birinci yarısında Azərbaycan və Hindistan arasında xarici ticarət dövriyyəsi $34 mln. təşkil edib. $28,82 mln. Hindistan mallarının ixracının, $5,86 mln. isə Azərbaycandan idxalın payına düşür.