Azərbaycan, Bakı, 28 yanvar/ Trend , müxbir A.Bədəlova/
"Nabukko" qaz kəməritikinti layihəsinin maliyyə tərəflərinin müzakirəsinin 2009-cu ildə başa çatdırılması nəzərdə tutulub. Bu barədə Nabucco Gas Pipeline International-ın rəsmi saytında yerləşdirilən məruzəsində bildirilir.
2010-cu ilin sonunadək layihənin bütün texniki, hüquqi, kommersiya və maliyyə məsələlərinin həll edilməsi planlaşdırılıb.
Məruzədə bildirilir ki, qazın tranziti üçün hüquqi bazanın yaradılmasına lazım olan layihənin üzv ölkələri və Türkiyə arasında hökumətlərarası sazişin imzalanması da 2009-cu ildə reallaşacaq. Budapeştdə keçirilən "Nabukko" layihəsinin perspektivlərinə həsr olunmuş sammitdə Macarıstanın Baş naziri Ferents Dyurçan bildirib ki, hökumətlərarası saziş iyunun 30-dək imzalanmalıdır.
Sammitdə Avropa İnvestisiya Bankı və Avropa Yenidənqurma və İnkişaf Bankının rəhbərləri institutlarının layihəyə maliyyə dəstəyi göstərməyə hazır olduqlarını bəyan ediblər.
Dəyəri 7,9 mlrd. avro olan "Nabukko" qaz kəməri ilə Azərbaycan və Mərkəzi Asiyadan Aİ ölkələrinə qaz ixracı nəzərdə tutulur. Boru kəmərinin maksimal gücü ildə 31 mlrd. kubmetrə bərabərdir. Layihənin iştirakçıları OMV, Macarıstanın MOL, Bolqarıstanın Bulgargaz, Rumıniyanın Transgaz, Türkiyənin Botas və Almaniyanın RWE şirkətləridir. Onların hər biri bərabər paya - 16,67 faiz paya malikdir.
Qaz kəmərinin tikintisinə 2011-ci ildən başlanması nəzərdə tutulub, boru kəməri üzrə ilk tədarüklər 2014-cü ildə başlanacaq.
Məqalə müəllifi ilə əlaqə ünvanı - [email protected]
