Azərbaycan, Bakı, 24 fevral / Trend /
Hazırda ARDNŞ-nin (Azərbaycan Respublikası Dövlət Neft Şirkəti) N.Nərimanov adına Neft və Qaz Çıxarma İdarəsi (NQÇİ) tərəfindən gündəlik hasilat 1050 ton neft və 1,3 milyon kubmetr qaz təşkil edir. Bu barədə ARDNŞ-nin çərşənbə günü yaydığı məlumatda bildirilir. NQÇİ-nin balansında "8 mart", "Ələt-dəniz", "Bulla dəniz" və digər yataqlar var. Həmçinin "Ümid" perspektivli qaz-kondensat strukturu da idarənin balansındadır. Hazırda şirkət bu yataqda ilk kəşfiyyat quyusunu qazır.
Həmçinin "8 mart" yatağında yeni quyunun qazılması üzrə işlər aparılır. Quyunun layihə dərinliyi 5800 metr təşkil edir. "8 mart" yatağı qaz proqramının həyata keçirilməsində əhəmiyyətli yer tutur. Yataq 1984-cü ildən istismara verilib. Hazırda burada 7 quyu fəaliyyət göstərir. Onlardan gündəlik 400 min kubmetr qaz hasil edilir.
Azərbaycanda 59 yataq var. Bunlardan 18-i dənizdə, qalanı isə quruda yerləşir.
