Azərbaycan, Bakı, 8 iyun /Trend, müxbir Ü.Sadıxova/
Neft-qaz sahəsində əməkdaşlığın müzakirəsi məqsədilə yaxın zamanlarda Azərbaycana Suriyanın nümayəndə heyəti gəlməlidir. Bunu Trend-ə çərşənbə axşamı telefonla Suriyanın neft nazirinin müavini Həsən Zeynəb deyib.
"Biz Azərbaycan tərəfindən tarixin dəqiqləşdirilməsini gözləyirik. Səfərin yayda baş tutması gözlənilir. Hələ ki, hər iki tərəfin nazirlərini qane edə biləcək tarix müəyyən olunur", - Zeynəb deyib.
Onun sözlərinə görə, səfər zamanı Dəməşq və Bakının neft və qaz sahəsində, həmçinin Azərbaycan qazının Suriyaya ixracı sahəsində əməkdaşlıq məsələləri müzakirə ediləcək.
Bu səfərin təşkili barədə qərar bundan əvvəl Azərbaycanın sənaye və energetika naziri Natiq Əliyevin, ARDNŞ-nin (Azərbaycan Respublikasının Dövlət Neft Şirkəti) yüksək vəzifəli nümayəndələrinin və Azərbaycan Dövlət Neft Akademiyasının rəhbərliyinin Suriyaya işgüzar səfəri zamanı qəbul olunub.
Bu səfər zamanı tərəflər təbii qazın ildə 1-1,5 milyard kubmetr həcmində alqı-satqısı haqqında uzunmüddətli sazişin imzalanmasına dair danışıqların başlanması üzrə razılaşma imzalayıb. Tərəflər həm də Azərbaycan qazının Suriya qaz nəqli şəbəkəsi ilə ərəb ölkələrinə ixracının perspektivlərini nəzərdən keçirib.
Zeynəbin dediyinə görə, Azərbaycan qazının ixracına Suriya ilə Türkiyə arasında birləşdirici qaz kəmərinin tikintisinin başa çatmasından sonra başlanacaq. Bu tikinti işləri 2011-ci ilin sonuna - 2012-ci ilin əvvəlinə palnlaşdırılıb. Bu ölkələr Hələb (Suriya) və Kilis (Türkiyə) arasında 63 kilometrlik qaz borusunun tikintisini həyata keçirir.
