Azərbaycan, Bakı, 7 sentyabr /Trend, müxbir E.İsmayılov/
Qazma işlərinin BP tərəfindən (Azərbaycanın "Şahdəniz" qaz-kondensat yatağının işlənməsi layihəsinin operatoru) görüldüyü "SDX-06" kəşfiyyat quyusunun dərinliyi 1400 metr təşkil edir. Bu barədə çərşənbə axşamı neft-qaz bazarındakı mənbə bildirib. Quyunun qazılması üzrə işlər yatağın işlənməsinin ikinci mərhələsi üzrə aparılır.
Mənbənin sözlərinə görə, 22 düymlük qoruyucu borular buraxılıb və indi qazma işlərinin bərpası üçün işlər görülür. Qazma 250 gün ərzində aparılacaq. Quyunun layihə dərinliyi 6500 metr təşkil edir.
Bundan əvvəl mənbənin dediyinə görə, quyu dənizin 100 metr dərinliyində yarıyüklənmiş qazma qurğusu "İstiqlal"dan aparılır. Bu, digərləri kimi, qazılması ikinci mərhələdə planlaşdırılan sualtı doldurma quyusudur.
İndi "Şahdəniz" yatğında beş quyu var. Onlardan biri pis texniki vəziyyətinə görə hissə-hissə ləğv edilib. Yatağın işlənməsinin birinci fazası çərşivəsində altıncı istismar quyusunun qazılması üzrə də işlər görülür.
Yatağın işlənməsinin birinci mərhələsi çərçivəsində hasilatın ən yüksək həddi 8,6-9 milyard kubmetr səviyyəsində proqnozlaşdırılır. Proqnozlara görə, yatağın işlənməsinin ikinci mərhələsi çərçivəsində qaz hasilatı həcmini ildə daha 25 milyard kubmetrədək çatdırmaq mümkün olacaq.
Hazırda "Şahdəniz" yatağında hasil edilən qaz Gürcüstan və Türkiyəyə "Cənubi Qafqaz" qaz kəməri ilə nəql olunur. Layihə çərçivəsində bu qazın bir hissəsini Azərbaycan da alır.
"Şahdəniz" yatağının ehtiyatları 1,2 trilyon kubmetr qiymətləndirilir.
"Şahdəniz" dəniz yatağının işlənməsi üzrə müqavilə 4 iyun 1996-cı ildə imzalanıb. Müqavilə iştirakçıları bunlardır: BP (operator) - 25,5 faiz, Statoil hydro - 25,5 faiz, NICO - 10 faiz, Total - 10 faiz, LukAgip - 10 faiz, TPAO - 9 faiz, ARDNŞ - 10 faiz.
