Azərbaycan, Bakı, 30 noyabr /Trend, müxbir E.İsmayılov/
Yanvar-sentyabrda Bakı-Tbilisi-Ceyhan (BTC) ixrac neft boru kəməri ilə 28,6 milyon ton (213,5 milyon barel) neft nəql olunub. Bu barədə "ВР Azerbaijan" şirkətinin üç rübün yekunları üzrə çərşənbə axşamı yaydığı hesabatda deyilir.
Məlumata görə, göstərilən dövrdə BTC çərçivəsində əsaslı xərclər 20,1 milyon dollar təşkil edib.
Azərbaycan BTC ilə Xəzərin Azərbaycan sektorundakı BP-nin operatoru olduğu "Azəri-Çıraq-Günəşli" yataqlar blokunda hasil olunan nefti və "Şahdəniz" yatağından hasil olunan qaz-kondensatı ixrac edir. Hesabatda deyilir ki, BTC Qazaxıstanın "Tengiz" yatağından hasil olunan neftin nəqli üzrə sazişə də malikdir.
2006-cı il iyunun 4-dən cari il noyabrın sonunadək BTC ilə dünya bazarlarına 1354 tanker vasitəsilə çatdırılan 142,4 milyon ton neft (1,063 milyon barel) nəql edilib.
2009-cu ildə BTC ilə 38 milyon tona yaxın (285 milyon barel) neft ixrac olunub. 2009-cu ildə BTC çərçivəsində əsaslı xərclər 92 milyon dollar təşkil edib.
"BTC Co"nun səhmdarları aşağıdakılardır: BP (30,1 faiz); AzBTC (25 faiz); "Chevron" (8,90 faiz); "Statoil" (8,71 faiz); ТРАО (6,53 faiz); "Eni" (5 faiz ); "Total" (5 faiz); "Itochu" (3,40 faiz); "Inpex" (2,50 faiz); "ConocoPhillips" (2,50 faiz) və "Amerada Hess" (2,36 faiz).
Yanvar-sentyabr aylarında qərb istiqamətindəki ixrac boru kəməri ilə (Bakı-Supsa) Supsa terminalına 23 milyon barelə yaxın neft nəql olunub. Üç rüb ərzində dəmiryolla 7,5 milyon barel neft nəql olunub.
...
