Azərbaycan, Bakı, 13 dekabr /Trend, müxbir E.İsmayılov/
ARDNŞ Türkiyədə tikiləcək yeni neft emalı zavodunun inşası üçün avadanlıq və texnologiyaların tədarükü üzrə Avropa və Asiya şirkətlərinin kommersiya təkliflərini nəzərdən keçirir. Bu barədə bazar ertəsi ARDNŞ-nin yüksək vəzifəli nümayəndəsi deyib.
Onun sözlərinə görə, artıq yeni neft emalı zavodunun mühəndislik işlərini detallı hazırlayacaq şirkət müəyyənləşdirilib. Xüsusilə də imzalanması yaxın vaxtlarda gözlənilən layihə üzrə müqavilə də hazırlanıb. Mənbə şirkətin adını çəkməyib, lakin qeyd edib ki, bu, tanınmış şirkətdir.
Tikintinin başlanması məsələsinə toxunan mənbə qeyd edib ki, bunun üçün bütün komponentlərin olması vacibdir, xüsusən də texnologiya, avadanlıq, eləcə də maliyyələşdirmə məsələlərinin həlli lazımdır. Xüsusilə, yeni NEZ-in tikintisinin maliyyələşmə mənbəyinin axtarışı üzrə danışıqlar və işlər aparılır. Yeni müəssisənin kreditlər hesabına tikintisi nəzərdə tutulur.
"Mənə elə gəlir ki, tikinti işlərinə gələn ilin yazında başlaya biləcəyik", - mənbə qeyd edib.
Zavodun ümumu istiqaməti, eləcə də onun 10 milyonluq ümumi gücü də müəyyənləşib. Planlara əsasən, tikinti üzrə işlərin 2014-cü il üçün başa çatdırılması planlaşdırılır.
Yeni NEZ ARDNŞ-nin iştirak payına malik olduğu Türkiyənin "Petkim" neft-kimya kompleksinin tələbatlarını ödəmək üçün tikilir. Zavodun tikintisinə 3,5-5 milyard dollar məbləğində investisiyanın yatırılması nəzərdə tutulur.
2008-ci ildə "SOCAR/Turcas Petrol/Injaz Projects" şirkətlər alyansı Türkiyənin "Petkim" neft-kimya holdinqində 51 faizlik səhm paketinin alınması üçün tenderin qalibi olub. Buna görə də alyansa 2,04 milyard dollar təklif edilib. Hazırda Türkiyə zəruri kimya məhsullarının 70-75 faizini idxal edir. "SOCAR/Turcas/Injaz"ın "Petkim"in inkişafına yatıracağı sərmayələr məhsul idxalını 30 faizədək azaltmağa imkan verir.
