Azərbaycan, Bakı, 28 sentyabr /Trend, müxbir E.İsmayılov/
Bu ilin 7 ayı ərzində Azərbaycan Rusiyaya 342,9 milyon kilovat-saat həcmində 21,8 milyon dollarlıq elektrik enerjisi tədarük edib. Trend-in məlumatına görə, bunu çərşənbə günü jurnalistlərə Bakıda Rusiyanın Azərbaycandakı ticarət nümayəndəsi Yuri Şedrin deyib.
Onun sözlərinə görə, bu dövr ərzində Rusiya Azərbaycana 2,5 milyon kilovat-saat həcmində 0,2 milyon dollarlıq elektrik enerjisi tədarük edib.
"Hazırda iki ölkə arasında enerji sistemlərinin paralel işinə dair saziş razılaşdırılma mərhələsindədir", - o deyib.
Həmçinin Bakı-Novorossiysk boru kəməri üzrə neftin vurulması üzrə danışıqlar da davam edir.
Sentyabrın əvvəlində Bakıda Azərbaycan neftinin Rusiya ərazisi ilə Bakı-Novorossiysk neft boru kəməri ilə nəql olunmasına dair 1996-cı il avqustun 18-də imzalanmış hökumətlərarası sazişə dəyişikliklər edilməsi üzrə işçi qrupunun iclası keçirilib.
Şedrinin sözlərinə görə, tərəflərdən hər birinin işçi qrupu daşınma, tarif həcmlərini, habelə neftin keyfiyyəti məsələlərini razılaşdırır.
Azərbaycan neftinin Rusiya ərazisi ilə Bakı-Novorossiysk neft boru kəməri ilə nəql olunmasına dair 1996-cı ildə imzalanmış ikitərəfli Rusiya-Azərbaycan hökumətlərarası saziş ildə 5 milyon ton neftin hər tonu üçün 15,67 dollar tarifi ilə nəql olunmasını nəzərdə tutur.
ARDNŞ Novorossiysk vasitəsilə öz yataqlarından, eləcə də ölkənin quru yataqlarında işləyən birgə müəssisələrin və əməliyyat şirkətlərinin hasil etdiyi neftin nəqlini həyata keçirir.
Bakı-Novorossiysk kəmərinin operatoru 2007-ci ilin sonunadək ABƏŞ olub, sonradan isə bu funksiyanı ARDNŞ-yə verib.
