Bakı. Trend:
Cari ilin yanvar ayında Bakı-Tbilisi-Ceyhan (BTC) boru kəməri ilə Türkiyə ərazisindən 16,125 milyon barrel neft nəql olunub.
Bu barədə Trend Türkiyənin “BOTAŞ” şirkətinə istinadən xəbər verir.
Müqayisə üçün 2025-ci ilin yanvar ayında bu göstərici 17,571 milyon barrel təşkil edib. Beləliklə, nəql olunan neftin həcmi 1,446 milyon barrel və ya 8,2 faiz azalıb.
Xatırladaq ki, 2025-ci ildə Türkiyə ərazisi ilə BTC vasitəsilə 206,434 milyon barrel neft nəql olunub.
Müqayisə üçün 2024-cü ildə bu göstərici 224,142 milyon barrel təşkil edib. Beləliklə, nəql olunmanın həcmi 7,9 faiz azalıb.
2002-ci ilin avqust ayında layihənin icrası üçün təsis edilmiş BTC Co. şirkətində pay bölgüsü aşağıdakı kimidir: bp (30.10%), SOCAR (32.97%), MOL (8.90%), TPAO (6.53%), Eni (5.00%), TotalEnergies (5.00%), ITOCHU (3.40%), ONGC Videsh (3.10%), ExxonMobil (2.50%) və INPEX (2.50%).