Azərbaycan,Bakı/müxbir Trend S.Əliyev/Norveçin "Statoil" şirkəti Azərbaycana "Şahdəniz" yatağından qaz satışına başlayıb. "Statoil"dən verilən məlumata əsasən, qazın digər alıcılara çatdırılması yataqdan hasilatın artırılmasından asılı olacaq.
"Çatdırılmalar müqavilələrin mexanizmlərinə əsasən həyata keçiriləcək", deyə "Statoil"dən bildirilib.
Azerbaijan gas supply company şirkətinin operatoru olan "Statoil" "Şahdəniz" yatağından qazın satışını həyata keçirir. "Şahdəniz"in texniki operatoru BP şirkətidir. Qaz Cənubi Qafqaz boru kəməri vasitəsilə Gürcüstan və Türkiyəyə çatdırılacaq.
"Şahdəniz" qazkondensat yatağında qazın hasili tamamilə sabitləşdirilib. Hazırda quyudan hər sutka təxminən 48 min barrel neft ekvivalenti - 5,6 mln. kub metr qaz və 15 min barrel kondensat əldə olunur.
BP-nin məlumatına əsasən, "Şahdəniz"in işlənməsi layihəsinin "Mərhələ-1" çərçivəsində plato mərhələsində ildə 8,6 mlrd. kub metr qaz əldə olunacaq. 2007-ci ildə "Şahdəniz" yatağından 2,8 mlrd. kub metr qaz əldə olunacaq.
