Azərbaycan, Bakı, 13 avqust / Trend , müxbir H.Vəliyev /
XV Azərbaycan Beynəlxalq "Telekommunikasiya və İnformasiya Texnologiyaları" - BakuTel-2009 sərgi və konfransı (4-7 noyabr) çərçivəsində Qaradəniz İqtisadi Əməkdaşlıq Təşkilatına (QİƏT) üzv olan ölkələrin rabitə nazirlərinin görüşü keçiriləcək. Bu barədə Trend -a Azərbaycan Rabitə və İnformasiya Texnologiyaları Nazirliyindən məlumat verilib.
Nazirlikdən qeyd olunduğu kimi, görüş zamanı tərəflər telekommunikasiya və informasiya texnologiyaları sahəsində QİƏT çərçivəsində əməkdaşlıq effektlərinin artırılması məsələsini müzakirə edəcəklər. Azərbaycan QİƏT çərçivəsində informasiya texnologiyaları üzrə işçi qrupuna rəhbərlik edəcək.
BakuTel sərgisi 1995-ci ildən etibarən hər il keçirilir. 2009-cu ildə sərginin sahəsi 1559 kvadratmetr olacaq. Sərginin işində 21 ölkədən (Almaniya, Rusiya, Avstriya, ABŞ, Qazaxıstan, Kanada, Çin, Yaponiya, Koreya və b.) 105 eksponent iştirak edəcək. Ziyarətçilərin sayı 14 000 nəfər civarında olacaq.
BakuTel-2009 sərgisinin əsas mövzu bölmələri teklekommunikasiya və İT, simsiz rabitə, peyk rabitəsi, teleradioyayım, bank texnologiyaları, təhlükəsizlik sistemi, təminat proqramı, avtomatlaşdırma sistemi və s. olacaq.
Məqalə müəllifi ilə əlaqə ünvanı: [email protected]
