Azərbaycan, Bakı, 5 dekabr /Trend, müxbir H.Vəliyev/
Azərbaycan Rabitə və İnformasiya Texnologiyaları Nazirliyi mobil texnologiyalardan (Mobile Signature) istifadə etməklə elektron rəqəmli imza (ERİ) sertifikatlarının verilməsi üzrə yeni platformanın hazırlanması ilə bağlı işləri başa çatdırır. Bu barədə Trend-ə layihəyə yaxın mənbə bildirib.
Mobil proqram yaxın vaxtlarda ictimaiyyətə təqdim ediləcək ki, bu da rəqəmli imzanın verilməsi prosedurunu sadələşdirəcək və "Elektron hökumət" (ehdis.az) portalının istifadəçi dairəsini genişləndirəcək.
İşlər nazirliyin Məlumat Hesablama Mərkəzinin laboratoriyasında aparılır.
Mobil telefonlarda ERİ-dən istifadə stolüstü və portativ kompüterlərdə rəqəmli imzanın tətbiqi metodundan fərqlənir. Mobil qurğularda ERİ-dən istifadə məsələsi yeni infrastruktura, avadanlığa və mobil sistemlərə keyfiyyətcə yeni yanaşma tələb edir.
Hazırda ERİ-nin GSM-şəbəkələrdə tətbiqi üçün xüsusi kriptoqrafik imkanlara malik SIM-kartlardan istifadə məsələsinə baxılır. Bu məsələdə SIM-kartlarda proqramın qurulmasının hansı struktur tərəfindən (sertifikatlı mərkəz, yoxsa operator) həyata keçiriləcəyi əsasdır.
