Azərbaycan, Bakı, 1 mart /Trend, müxbir H.Vəliyev/
Azərbaycanın İT şirkətlərinin məhsullarının yayılması üçün perspektiv bazarlar Afrika, Yaxın Şərq və MDB bazarları ola bilər. Bu barədə Trend-ə telekomunikasiya sahəsindəki mənbə məlumat verib.
Yaxın prespektivdə İT avadanlıqları və xitmətlərinin Əfqanıstan və İran bazarlarına tədarükü məsələsinə baxılır. Mənbə hesab edir ki, bu gün Azərbaycanın yerli şirkətlərinin yüksək texnologiyalar bazarına, məsələn, Yaponiya bazarına çıxmasından danışmaq hələ tezdir.
"Yaponiya bazarı rəqabət qabiliyyətli və yüksək keyfiyyət tələb edir. Bu mərhələyə çatmaq üçün hələ çox yol qət olunmalıdır. Bu bazara çıxmaq üçün ilk növbədə regional bazarları ələ keçirməliyik. Bu gün bizim bazarımız çox kiçikdir. İnkşaf etmiş bazarlara daxil olmaq üçün hələ ki, yerli məhsulların rəqabətə davamlılığı aşağıdır", - deyə mənbə bildirib.
Mənbənin fikrincə, ölkədə bu sahədə texnologiya parkı, İKT-yə dəstək fondu və İT universitetin yaradılması özəl sektorun güclənməsində çox böyük rol oynaya bilər. Mənbə bildirib ki, hər üç layihəyə kompleks şəkildə baxılmalıdır. Çünki onların ayrı-ayrılıqda həyata keçirilməsi İKT sektorunun məhsuldarlığını azalda bilər.
