Azərbaycan, Bakı, 3 oktyabr /Trend, müxbir H.Vəliyev/
Səhiyyə Nazirliyi tərəfindən 757 507 elektron sağlamlıq kartı verilib. Bu barədə cümə axşamı Trend-ə nazirliyin Səhiyyənin İnformasiyalaşdırılması Mərkəzinin direktoru Cəbrayıl Əsədzadə bildirib.
Onun sözlərinə görə, 60 445 ədəd elektron kart dərman preparatlarının pulsuz əsasda paylandığı pasiyent kateqoriyasına verilib, 181 026 kartı isə tibbi müayinədən keçən pasiyentlər alıblar.
Elektron sağlamlıq kartları Səhiyyə Nazirliyinin İctimai Səhiyyə və İslahatlar Mərkəzində hazırlanır və poliklinikalar vasitəsilə yeni doğulmuş körpələrin valideynlərinə və pasiyentlərə təqdim edilir.
Kartlarda sahibinin şəxsiyyəti, tibbi və sosial sığorta və s. haqqında məlumatlar yer alır. İnformasiya tibb müəssisəsinin xidməti məlumatlarının operativ mübadiləsinə imkan verən vahid məlumat bazasında yerləşdirilir.
Bu günədək nazirliyin tabeliyində olan bütün doğum evləri, xəstəxanaların doğum şöbələri və uşaq tibb müəssisələri bu sistemə qoşulub.
