Azərbaycan, Bakı, 31 mart /Trend, müxbir H.Vəliyev/
2014-cü ilin birinci rübünün yekunları üzrə Azərbaycan Səhiyyə Nazirliyi tərəfindən verilən elektron sağlamlıq kartlarının sayı 0,85 faiz artıb. Bu barədə Trend-ə nazirliyin Səhiyyənin İnformasiyalaşdırılması Mərkəzindən bildirilib.
Mərkəzin məlumatına görə, verilən kartların sayı 6 773 ədəd artaraq 797 378-ə çatıb.
Bundan əlavə, yanvar-mart aylarında 401 ədəd elektron kart dərman preparatlarının pulsuz əsasda paylandığı pasiyent kateqoriyasına verilib. Bu kateqoriyadan olan pasiyentlərə verilən kartların sayı 61 942 ədədə çatıb. 13 027 ədəd kartı isə tibbi müayinədən keçən pasiyentlər alıblar ki, bu da ilin əvvəlinə olan göstəricidən 6,64 ədəd çoxdur. Bu kateqoriyadan olan pasiyentlərə ümumilikdə 209 198 kart verilib.
Elektron sağlamlıq kartları Səhiyyə Nazirliyinin İctimai Səhiyyə və İslahatlar Mərkəzində hazırlanır və poliklinikalar vasitəsilə yeni doğulmuş körpələrin valideynlərinə və pasiyentlərə təqdim edilir.
Kartlarda sahibinin şəxsiyyəti, tibbi və sosial sığorta və s. haqqında məlumatlar yer alır. İnformasiya tibb müəssisəsinin xidməti məlumatlarının operativ mübadiləsinə imkan verən vahid məlumat bazasında yerləşdirilir.
Bu günədək nazirliyin tabeliyində olan bütün doğum evləri, xəstəxanaların doğum şöbələri və uşaq tibb müəssisələri bu sistemə qoşulub.