Keçmiş SSRİ ölkələri arasında İnternet şəbəkəsindən istifadə üzrə orta dünya göstəricisini (16%) yalnız Estoniya (50%), Latviya (35,3%), Litva (28,3%), Belorus (25,3%) və Rusiya (16,5%) keçib. Bu barədə Trend ə Azərbaycan Milli Elmlər Akademiyasının İnformasiya Texnologiyaları İnstitutunun direktoru Rasim Əliquliyev məlumat verib.
Onun sözlərinə görə, bu göstəriciyə çatmamış ölkələrə Azərbaycan (7,9%) da daxildir. Ölkə Ukrayna (11,4%) və Moldovadan ( 10,6%) geri qalsa da, Ermənistan (5,1%), Qırğızstan (4,9%), Gürcüstan (4%), Özbəkistan (3,3%), Qazaxıstan (2,7%), Türkmənistan (0,5%) və Tacikistanı (0,1%) qabaqlayır.
2003-cü ildən 2006-cı ilin I yarısınadək Azərbaycanın beynəlxalq İnternet şəbəkəsinə informasiya ixracı 821 Tb, ixracı isə 620 Tb-ı keçib. İnformasiya ixracının dinamikası 21, idxalı isə təxminən 8 dəfə artıb.
Bütün dünyada İnternet istifadəçilərinin payı əhalinin sayına nisbətdə (6.499.697.060 nəfər) 16% (1.043.104.886 istifadəçi) təşkil edib. Asiyanın payı 36,5%, Avropanın - 28,2%, Şimali Amerikanın - 21,8%, Latın Amerikası və Karib ölkələrinin -7,8%, Afrikanın -2,3%, Orta Asiyanın - 1,7%, Okeaniya və Avstraliyanın - 1,7% olub.
Azərbaycanda ilk dəfə İnternetə çıxış 1991-ci ildə akademik Əli Abbasovun (hazırda rabitə və informasiya texnologiyaları naziri) rəhbərliyi ilə İnformasiya Texnologiyaları İnstitutu tərəfindən həyata keçirilib.
Hazırda ölkə beynəlxalq İnternet şəbəkəsinə operator AzerSAT və NATO-nun "Virtual İpək Yolu" layihəsinin köməyi ilə çıxır.
Azərbaycanda İnternet-provayder şirkətlərinin sayı 25-ə bərabərdir.
"Ölkədə yüksək keyfiyyətli İnternet xidmətləri göstərmək üçün Rabitə Nazirliyi "Elektron Azərbaycan" dövlət proqramı çərçivəsində bir çox işlər həyata keçirir", - deyə institutun direktoru vurğulayıb.
O qeyd edib ki, bu istiqamətdə araşdırmalar rəhbərlik etdiyi institut üçün prioritetdir.