Bakı. Trend:
Baykar və OGM (Ümumi Meşə Müdirliyi) arasında imzalanan müqavilə ilə Bayraktar TB2 PUA-ları hazırda Manisa/Akhisar, Muğla/Milas, Kütahya/Zafer, Antalya/Gazipaşa və Ədirnə/Keşan olmaqla 5 nöqtədə yerləşdirilib.
Trend xəbər verir ki, bu barədə TurkicWorld-a “Baykar” şirkətinin ictimaiyyətlə əlaqələr şöbəsindən məlumat verilib.
Qurumun açıqlamasında bildirilib ki, son illər yüzlərlə yanğın hadisəsi səmalarda müşahidə aparan Bayraktar TB2-lər sayəsində tez aşkar edilərək, böyük fəlakətlərin qarşısı alınıb. Lakin bir çox yerli və xarici mediada görülən müsbət işlərə pərdə salmaq istəyənlər də az deyil.
Qurumun açıqlamasını diqqətinizə çatdırırıq:
“5 nöqtədə yerləşdirilən 5 ədəd Bayraktar TB2 PUA ilə yanaşı, cəmi 9 ədəd Bayraktar TB2 PUA, Baykar tərəfindən pulsuz yerləşdirilən 4 ehtiyat Bayraktar TB2 PUA ilə birlikdə Meşə Təsərrüfatı Ümumi Müdirliyinin yanğınsöndürmə fəaliyyətlərinə xidmət edir. Bayraktar TB2 PUA-ları gündə ən az 10 saat və meteoroloji şərait və hava hərəkəti uyğun olduqda 5 PUA ümumilikdə gündə ən az 50 saat uçaraq Yaşıl Vətəni təhlükələrə qarşı səmadan izləyir. Böyük miqyaslı meşə yanğınlarında uçuş xidməti 24 saata qədərdir. Bundan əlavə, bütün prosesi “Baykar” personalı həyata keçirir.
Müqaviləyə əsasən, “Baykar” meşə yanğınları ilə mübarizə üçün bütün texniki avadanlıqların tədarükü, quraşdırılması və istifadəsi, hava limanlarında istifadə olunan yerlərin icarəsi, elektrik və su xərcləri, bütün personal xərcləri, texniki qulluq, ehtiyat hissələri, təmir və yanacaq xərclərini öz üzərinə götürür. “Baykar”da yuxarıda qeyd olunan yanğın aşkarlama fəaliyyətləri üçün cəmi 30 personal çalışır.
Bunlara əlavə olaraq, Baykar 2021-ci ildə OGM-də meşə yanğınları ilə mübarizə aparmaq üçün tələb olunan yüksək texnologiyalı infrastrukturu tam şəkildə qurub.
Türkiyə bu sahədə qarşılaşacaq problemlərin müəyyənləşdirilməsinə uzaqgörən bir perspektivlə yanaşaraq, Avropada meşə yanğınları ilə mübarizədə PUA-lardan istifadə edən ilk ölkə oldu.
Avropa Meşə Yanğınları İnformasiya Sisteminin (EFFIS) 2021-ci ildə dərc etdiyi hesabatlarda yer alan məlumatlara görə, bu qabaqcıl mübarizə üsulu ilə ölkəmiz meşə yanğınları ilə mübarizədə ən uğurlu ölkə olub.
OGM-nin məlumatları və mediada dərc olunan xəbərləri nəzərə alsaq, PUA-lar da daxil olmaqla yüksək texnologiyanın tətbiqi ilə meşə yanğınlarına ilk reaksiya müddəti təxminən 45 dəqiqədən 11 dəqiqəyə enmişdir.
Ancaq ötən illərdə Yunanıstanda, Avropada, Avstraliyada uzun müddət, hətta aylarla davam edən meşə yanğınları bütün bəşəriyyət tərəfindən çarəsiz şəkildə izlənildi.
Məsələnin nə qədər vacib olduğu və meşə yanğınlarına qarşı bütün texnoloji imkanlarımızdan istifadə etməyin zəruriliyi göz qabağındadır.
2020-ci ildə Bayraktar TB2 PUA-ların istifadəyə verildiyi zaman 345 yanğın ilk anda aşkar edilib və böyümədən söndürülüb. 2021-ci ildə PUA-lar 267 yanğının aşkarlanması və söndürülməsində fəal rol oynayıb.
Keçən il, 1 iyun - 15 noyabr 2022-ci il tarixləri arasında Bayraktar TB2, OGM-nin məlumatlarına görə, ilk anda 1109 yanğın aşkar etdi və Yaşıl Vətənin qorunması üçün çox əhəmiyyətli xidmətlər göstərdi.
Alimlərin fikrincə, dünya tarixinin ən isti yaylarından birini yaşadığımız bu günlərdə qonşumuz Yunanıstanda, Aralıq dənizi hövzəsində, Avropada və Kanadada baş verən meşə yanğınlarını kədərlə izləyirik. Meşəçilərimiz yanğınlarda şəhid olur, dünyanın müxtəlif yerlərində insanlar ölür, meşədə yaşayan heyvanlar tələf olur, dünya zədələnmiş ekosistemlə birlikdə ona nəfəs verən ciyərlərini itirir.
Ölkəmizdə 1 iyun 2023-28 iyul 2023-cü il tarixləri arasında aşkar edilmiş 285 meşə yanğınından 192-si aparılan işlər sayəsində ilk dəfə Bayraktar TB2 PUA-lar tərəfindən aşkar edilib. Bu yanğınlar OGM-nin sadiq komandaları tərəfindən böyümədən söndürüldü.
İmzalanmış müqavilənin qiyməti dünyada analoji uçuş/saat pullu xidmətlərdən xeyli aşağıdır. Daha da önəmlisi odur ki, müqavilədəki saatlıq uçuş haqqı hətta bu xidməti göstərən ən yaxın ekvivalentin təxminən 1/3 hissəsidir.
Ötən illərdə bu xidmətləri ləkələməyə çalışan oxşar xəbərlər yayılıb. İctimaiyyətə hörmətlə bildiririk ki, “Baykar”ı ləkələmək üçün, belə bir fikir yaratmaq üçün bu və buna bənzər cəhdlərə qarşı qanuni tədbirlər görəcəyik”.