Bakı. Trend:
ABŞ və Çin arasında qarşılıqlı olaraq ticarət rüsumlarının azaldılması ilə bağlı İsveçrədə əldə olunmuş razılaşma bu gün Pekin vaxtı ilə saat 12:01-də (Bakı vaxtı ilə 09:01-də) qüvvəyə minib.
Bu barədə Trend xarici KİV-ə istinadən xəbər verir.
Çin-Amerika ticarət-iqtisadi məsələləri üzrə danışıqları 10-11 may tarixlərində İsveçrədə baş tutub.
Danışıqların nəticəsi olaraq, Çin Xalq Respublikası və ABŞ 14 may tarixindən etibarən aprelin əvvəlindən tətbiq olunmuş əlavə rüsumların 10%-ə endirilməsi barədə razılığa gəliblər.
ÇXR Dövlət Şurasının Tariflər Komitəsinin 4 aprel tarixli fərmanına əsasən, ABŞ istehsalı olan bütün məhsullara 34% məbləğində rüsum tətbiq olunmuşdu. Hazırda bu rüsum 10%-ə endirilib, əlavə 24 faiz bəndi isə 90 gün müddətinə “dondurulub”. 9 aprel və 11 aprel tarixli fərmanların qüvvəsi ləğv olunub — həmin fərmanlarla əlavə rüsumlar ardıcıl olaraq 84%-ə və 125%-ə qədər artırılmışdı. Bu qərar tariflərin 91 faiz bəndi həcmində azaldılması deməkdir.