Respublika Baş Dövlət Yol Polisi İdarəsinin məlumatı əlavə olunub. İlk xəbər saat 09:17-dı yayılıb.
Azərbaycan, Bakı, 5 iyul / Trend müxbir K.Zərbalıyeva/
Bakı-Şamaxı yolunda ağır yol qəzası olub, 4 nəfər ölüb, 2 nəfər xəsarət alıb.
Trend-in Fövqəladə Hallar Nazirliyinin rəsmi saytına istinadən verdiyi məlumata görə, Bakı-Şamaxı yolunun 61-ci kilometrliyində Qobustan rayonu ərazisində "Mercedes" və "VAZ-21015" markalı minik avtomobilləri toqquşub.
Hadisə yerində əməliyyat şəraiti qiymətləndirilərkən məlum olub ki, "Mercedes" markalı avtomobilin sürücüsü və "VAZ-21015" markalı avtomobildə şəxsiyyətləri məlum olmayan 5 nəfər sərnişindən 1-i yanğınsöndürən-xilasedicilər hadisə yerinə çatana kimi, təcili tibbi yardım tərəfindən aidiyyəti üzrə aparılıb, qalan 4 nəfər aldıqları ağır bədən xəsarətlərindən hadisə yerində dünyalarını dəyişiblər.
"VAZ-21015" markalı avtomobilin sürücüsünün sıxılmış vəziyyətdə qalmış meyiti yanğınsöndürən-xilasedicilər tərəfindən müxtəlif alət və avadanlıqlardan istifadə edilməklə avtomobildən cıxarılaraq aidiyyəti üzrə təhfil verilib.
Hadisə ilə müvafiq qurumlar tərəfindən təhqiqat aparılır.
Respublika Baş Dövlət Yol Polisi İdarəsindən Trend-ə verilən məlumata görə, Cavad Məmmədovun idarə etdiyi "VAZ 21015" markalı avtomobil əks istiqamətdə hərəkətdə olan Nicat Əhmədovun idarə etdiyi "Mercedes" markalı avtomobillə toqquşub.
Nəticədə sürücü Məmmədov, sərnişinləri - Cahid Xəlilov və adları hələlik istintaqa məlum olmayan iki kişi sərnişin hadisə yerində həlak olub.
"Mercedes"in sürücüsü və digər avtomobilin sərnişini Cəlil Məmmədov isə xəsarət alaraq Kliniki Tibbi Mərkəzə yerləşdiriliblər.