Azərbaycan, Bakı, 15 noyabr /Trend, müxbir İlkin İzzət/
Bakıda narkotiklərin qanunsuz dövriyyəsi və oğurluqla məşğul olan cinayətkar qrup ifşa edilib.
Bakı Şəhər Baş Polis İdarəsinin mətbuat xidmətindən Trend-ə verilən məlumata görə, Bakı Şəhər BPİ Narkotiklərə qarşı Mübarizə İdarəsi əməkdaşlarının keçirdiyi əməliyyat-axtarış tədbirləri nəticəsində Bakı şəhəri ərazisində narkotiklərin qanunsuz dövriyyəsində və oğurluqda şübhəli bilinən qrup, Bakı şəhər sakinləri - 1989-cü il təvəllüdlü Ruslan Babayev, Zaur Kazımov, Nazim Babayev yaxalanaraq istintaqa təhvil verilib.
İlkin əməliyyat istintaq araşdırmaları ilə müəyyən olunub ki, şübhəli şəxslər mağazalardan taladığı qiymətli spirtli içkiləri və şirniyyatları paytaxt ərazisində dəyər-dəyməzinə sataraq, əldə olunan gəliri bərabər bölüblər. Z.Kazımov, N.Babayev bu vəsaiti narkotiklərə, R.Babayev isə öz şəxsi ehtiyaclarına xərcləyərək vətəndaşlara külli miqdarda maddi ziyan vurublar.
Şübhəli şəxslər ətrafında əməliyyat-istintaq tədbirləri davam etdilir.